Abalimi bemaphandleni bathi babhekana lodubo nxa bethengisa amabele abo njalo bakhuthaza uhulumende ukuthi akhweze intengo yomumbu kusiphala sesizwe ukuze labo basale lemadlana.
Bekhuluma embukisweni walonyaka oweMatabeleland South Agricultural Show ovulwe ngokusemthethweni ngoMgqibelo eGwanda inengi labalimi bemaphandleni liveze ukuthi lihlangana lendubo ezitshiyeneyo lapho sekumele lithengise amabele loba umumbu.
Izansi yemaNdebeleni ivele ithola izulu elilutshwane njalo abalimi bakhuthazwa ukuthi balime amabele kanye lenyawuthi.
UNkosazana Royce Ngwenya osuka eHomestead eMaphisa uthi ulima isifumbatha kodwa akulamuntu othenga lelibele.
Omunye umlimi uNkosazana Agnes Ngwabi okaWard 24 eMatobo ukhala ngokuthi lapho bethengisa umumbu esiphaleni seGrain Marketing Board imali yabo ifakwa emabhanga okudala ukuthi kubenzima ukuthi bayikhuphe njengoba imali isilela elizweni.
UNkosazana Anna Dube oweGwatemba eInsiza onguye onqobileyo emncintiswaneni wabalimi bamabele lomumbu uxwayise abanye abalimi ngalokho okumele bakwenze ukuze babe lesivuno esihle.
Kusenjalo umbukiso lo uvulwe ngokusemthethweni ngosaphethe isihlalo somqondisi wenkampani yesamende eyePortland Pretoria Cement PPC Zimbabwe uMnu. Marvelous Sibanda othe bazaqhubekela phambili bencedisana labalimi.
UMkhokheli walumbukiso uMnu. George Chipengo uthi bajabulile ngendlela lumbukiso oqhutshwe ngayo.
