Ubuncitshi bokulungiswa kwama basikithi lengcebethu buyabukiswa edolobheni le Harare ngesikhathi abaphatheke emsebenzini wokweluka lezi zinto bekhala ngokuthi babhekana lobunzima bokungatholi indawo zokuthengisela impahla yabo.
Abeluka ingcebethu lama basikiti batshengisa imisebenzi yabo embukisweni owenzelwa eHarare Gardens ngemva kwe Gallery yeZimbabwe, inengi lababukisayo bengabavela ezigabeni zeMandebeleni.
Unkosikazi Judith Ncube weBulawayo Home Industries etholakala emzini weMzilikazi uthi batshengisa ubuncitshi bokweluka imihlobo etshiyeneyo yengcebethu lama basikiti. Uthi idolobho lako Bulawayo lilabantu abalobuncitshi obumangalisayo kulumsebenzi ngakhoke sebekhuthaza ukuqiniswa kokusebenzelana lezinye indawo ezingaphandle kwalelidolobho.
Umqondisi we Binga Craft Centre etholakala eBinga Centre umnumzana Matabbeki Mudenda uthi inhlanganiso yakhe elamalunga azinkulungwane ezedlula ezimbili eluka ingcebethu lama basikiti ngobuciko obukhulu okokuthi aphuma emahle okwamagama kodwa inkinga ababhekane layo okwamanje yikusilela kwendawo zokuthengisela. Uthi imisebenzi enje iphathisa izakhamizi eBinga lasendaweni ezigombolozeleyo ukuze zithole inzuzo eziphathisa ukufundisa abantwana okukuthi sokulabantu abalezikhundla emapoliseni kubutho lababalisi abafundiswa yimali yama basikiti.
Unkosikazi ncube uqhubeka ethi inhlanganiso yakhe iyalubona udubo lokusilela kwendawo zokuthengisela ethi kanjalo iyaphathisa layo kukufundisa uzulu ngokulungiswa kwama basikiti lokuthengiswa kwawo:
Abanye ababukisayo bagoqela iLupane Women’s Centre kunye le Zenzele Foundation etholakala eMasvingo ejonge ukuphathisa intandane labaswelayo kunzuzo evela emisebenzi yabo yezandla. Lumbukiso uzaphela ngenyanga ezayo ekaLwezi.