Amalunga ebandla le Zanu PF akhangelelwe ukuthi azatshengisela emgwaqweni eHarare ngoMvulo ekhuthaza uzulu ukuthi kwenziwe ukhetho olungeladlakela lonyaka.
Ilunga lebandla leli, uMnu. Godfrey Tsenengamu, uthi ukutshengisela lokhu kuveza ukuthi basekela okukhulunywa nguMongameli Emmerson Mnangagwa ofisa ukuthi mhlaka 30 ngoNtulikazi kuqhutshwe ukhetho olubalulekileyo.
Abalandeli bebandla le Zanu PF abanengi bakhangelelwe ukuthi bazaphatheka ekutshengiseleni lokhu.
Kusenjalo, izizalwane zezimbabwe ezihlala kwele Bhilithane zithi umanyano we-MDC Alliance uchitha isikhathi ngokutshengisela emigwaqweni ukhonona ngamalungiselelo okhetho oluzayo. Umanyano lo ufuna ukuthi kube lenkampani ezimele yodwa ezahlola ugwalo lokuvota, banikwe ithuba lokukhankasa kumaphephandaba lemisakazo edlelana lohulumende lokunye okutshiyeneyo.
Kodwa-ke umanyano we-MDC Alliance uthi kunengi okumele kulungiswe yikhomishini ye-Zimbabwe Electoral Commission edinga amankampani engasebenza layo isebenzisa lokhu okuthiwa yi-government tender.
UMnu. Mbuso Siso, okubandla leMDC ekhokhelwa nguMnu. Welshman Ncube elikumanyano we MDC Alliance, uthi kuqakathekile ukutshengisela emigwaqweni okwenziwa ngumanyano lo. Uthi okuhlupha kakhulu ludaba lokudinda ama ballot papers azasetshenziswa kukhetho oluzayo.
