Umantshi Walile Ukuvumela Intathelizindaba uBlessed Mhlanga Ukuthi Ebhale Imihloliso Esejele

Umantshi weHarare ngoLwesihlanu walile ukwamukela isicelo sentathelizindaba yeAlpha Media Holdings uBlessed Mhlanga esokuthi avunyelwe ukuloba imihloliso yakhe esejele.

Igqwetha lakhe uMnu Chris Mhike utshele inkantolo ukuthi uMhlanga uyafunda njalo ulemihloliso amele ayibhale ngoLwesithathu mhlaka 19, kubike iphephandaba leNewsDay.

Kodwa umantshi uMnu Isheanesu Matova uthe isicelo lesi singaphezu kwamandla akhe.

UMhlanga uselamaviki phose amathathu evalelwe ngemva kokubotshwa esetheswa amacala okwethula imbiko ephehla udlakela phezu kwengxoxo azenza kumabonakude weHStv loMnu Blessed Geza, okhokhela obalwa impi yenkululeko abathi uMongameli Emmerson Mnangagwa kumele esuke embusweni.

Umthethwandaba weHigh Court awukethuli isinqumo phezu kwesicelo sakhe sokuthi akhululwe ngemali yesibambiso, i-bail, ukuze athonisiswe evela ngekhaya.

Ingcwethi kwezokwethulwa kwemibiko uMnu Mthulisi Mathuthu, yena ohlaziya njalo ezombusazwe utshele iStudio 7 ukuthi esikhathini esinengi abatshutshisi bathatha izinqumo ezingekho emthethweni, ikakhulu lapho okubandakanyeka khona abasolwa abachothoza uhulumende.

Kusenjalo, inkantolo yeChivhu ikhulule ukhansila kaWard 12 eChikomba West uMnu Ishmael Maukazuva, obotshwe ngoLwesithathu esetheswa icala lokuthuka uMongameli Emmerson Mnangagwa.

Amapholisa athi uMaukazuva wadala lelicala ngokuthumela i-video ngeWhatsApp, eyayiveza omunye owesifazana ekhonona ngokuthi uMnangagwa uyisehluleki.

Kodwa inhlanganiso yeZimbabwe Lawyers for Human Rights ithi abatshutshisi bachithe lelicala ngoLwesihlanu.

Embed share

Ingxoxo loMnu Mthulisi Mathuthu

by VOA

Embed share

The code has been copied to your clipboard.

The URL has been copied to your clipboard

---

No media source currently available

0:00 0:02:34 0:00

Lapho esitholakala khona

• 32 kbps | MP3
• 64 kbps | MP3

Ukudlala