Abasekeli becele leCitizens Coalition for Change abagoqela umkhokheli wabo uMnu. Jameson Timba labanye bakhe abafika amatshumi ayisikhombisa – 77, ababotshwa ngoNhlangula, sebetholakale bengelacala lokwenza umsindo emphakathini ngemva kokuhlala eRemand Prison okwenyanga phose ezimbili.
Loba betholakale bengelacala, abanye babo bavalelwe ukwenzela ukuba bethoniswe elinye njalo icala lokutshotshozela udlakela. Abaphikisayo bathi lokhu kuveza ukuba imithethwandaba eZimbabwe isibanjwe xhaka libandla leZanu PF.
Umthethwandaba eHarare namuhla unqume ukuba kabalamacala okuphazamisa umphakathi bonke abebandla leCCC ababotshwa bethakazelela usuku lweDay of the African Child emzini kaTimba ngoNhlangula lonyaka.
Abalitshumi batholakala bengela macala okutshotshozela udlakela lokudunga umphakathi. Bahle bakhululwa ngumthethwandaba. UTimba labanye bakhe abetheswa amacala okutshotshozela udlame balokhu bevalelwe entilongweni.
Abanye babo bathi babotshwa bezenzela umsebenzi wabo duzane lendlu kaTimba. Esipha isigwebo sakhe, uMantshi uCollet Ncube, uthe abatshutshisi behluleke ukuveza ubufakazi bokuba abantu laba balecala.
Omela iHwange Central edale lephalamende ekubandla leCCC njalo eligqwetha elizimeleyo, uMnu. Daniel Molokele, uchasise okwenzakale emthethwandaba namhlanje.
“Ngisanda kuphuma kudale le Harare elika Mantshi, idale lithe icala lesibili elokuba indlu ka Timba kusemphakathi icala labo lakhitshwa kubonke. Elesibili elokutholi bahlangana befuna ukwenza udlakela abalitshumi sephumile, abanye abasele lo Timba bazaqhubeka besejele.”
Kusenjalo, idale leHigh Court livumele abathathu abalwela ilungelo loluntu – uMnu. Samuel Gwenzi, uNkosazana Namatai Kwekweza loMnu. Robson Chere – ukuba behlawule isibambiso sebail ukwenzela ukuba bethoniswe amacala abawetheswayo besuka emzini yabo.
Umahluli wedale leHigh Court, uJustice Benjamini Chikowero, uthe kasuthisekanga ngezizatho ezethulwa ngumantshi uRuth Moyo owathi akumelenga abantu laba bevunyelwe ukuhlawula isibambiso sebail.
Omunye wabo uMnu. Vusumuzi Moyo lokhu evalelwe eRemand Prison. Abaphikisayo bathi okwehlela abantu laba yikho kanye okwabhekana loMnu. Job Sikhala owahlala entilongweni phose okweminyaka emibili kodwa amacala akhe esulwa ngumthethwandaba. Isikhulumeli sebandla leZanu PF, uMnu. Chris Mutsvangwa, usanda kutshela amaphephandaba ukuba besekufanele uChere labanye bakhe bekhululwe ngoba uqhutshwe kahle umhlangano weSADC Summit okuthiwa babefuna ukuwuphazamisa.
UMnu Alfios Mapuranga okubandla le-United African National Congress uthi lokhu kuveza sobala ukuba uhulumende uyangenela kulokho okwenzakala emthethwandaba.
“Kusobala ukuba ngesikhathi bebotshwa kwaba lokungenela kwezombusazwe okuyinto esithi kumele ime ukwenzakala kuleli. Imthethwandaba kwakungamelanga ibabophe yikho bethokala bengelamacala.”
Lokhu kusekelwa ngowake waba yisikhulumeli seCCC, uMnu Gift Ostallos Siziba.
"’Kusobala ukuba uhulumende ka Mnangagwa waphatheka ekubotshweni kwabantu phambili komhlngano esebenzis amadale, sizaqhubeka sikulwisa lokhu.”
Kodwa okudale leZanu PF Central Committee, uMnu. Mabutho Moyo, uthi ibandla lakhe alilani lokubotshwa njalo lokukhululwa kwabantu laba.
“Ibandla le ZANU PF alilani lokwenzakale emadale, abantu laba bayatshinga nxa emadale engabasekeli kodwa nxa ebasekela abafuni kuvuma ukuba amadale awathathi cele. Asilani lokwenzakele namhlanje.”
Kwabotshwa abantu abafika phose ikhulu lamatshumi ayisikhombisa ngesikhathi kulungiselwa umhlangano omkhulu owenkokheli yeSouthern African Development Community owaqhutshelwa eHarare kunyanga edluleyo.
Forum