Balutshwana abantu abakade bekhangelele ukuthi iqembu lenguqu ele Brazil lizazololonga ukudlala kwalo liseZimbabwe limelele ukuyadlala emcintisweni wamazwe womhlaba wenkezo ye 2010 FIFA World Cup eSouth Africa.
Babuyile oKaka labo Robinho benza lokhu abakujayeleyo kwathi-ke ele Zimbabwe labhuqwa ngokuhlohlwa kathathu lehluleka ukubisela loba okukodwa nje zwi.
Abacubungula ezomdlalo wenguqu bathi bekusaziwa ukuthi iqembu le Brazil lizanqoba ele Zimbabwe kodwa-ke bekungaziwa ukuthi izalithela emambuleni kangaki.
Abantu bayazibuza ukuthi kambe ukwethekelela kwaleliqembu elilodumo eZimbabwe kungabe kube yisifundo na kulabo abakunhlanganiso ye Zimbabwe Football Association.
Umnu. Omega Sibanda ingcwethi ecubungula ezomdlalo wenguqu lo Mnu. Kennedy Ndebele owayengu nobhala jikelele we Premier Soccer League lomgcinisihlalo weqembu le Highlanders Football Club bahlaziya loludaba lo Gibbs Dube we Studio 7.
