Uhulumende wakwele Zimbabwe uthi ukuthunjwa kuka Dokotela Peter Magombeyi ngabacatshangelwa ukuthi ngamapholisa ensitha kungabe kwenziwe ngabantu abafuna ukuyangisa ilizwe.
UMnu. Sibusiso Moyo, umphathintambo kahulumende obona ngezokudlelana lamanye amazwe, uthi abathumbe uDokotela Magombeyi kade befuna lokhu kuqondane lesililo sikamuyi uRobert Gabriel Mugabe, owayengumongameli welizwe leZimbabwe, njalo langokwethekelela elizweni kwesithunywa senhlanganiso yamazwe omhlaba wonke jikelele eyeUnited Nations, uMnu. Clement Nyaletsossi Voule.
“Uhulumende welizwe leZimbabwe likhathazwa yikuthunjwa kuka Dokotela Peter Magombeyi okwenzakala endlini yakhe eBudiriro ngempelaviki. Kulandela ubudlova lobu, uhulumende ucele bonke abomvikela ukuthi badinge uDokotela Magombeyi okumele abiselwe emulini yakhe.
“Uhulumende omutsha uzonda ukubona abantu befakwa engozini. Kuyamangalisa ukuthi nxa kulemihlangano emkhulu kumbe kulezethekeli ezivela kwamanye amazwe kuba lomuntu othunjwayo. Izikliwi lezi zijayele ukwenza lokhu ebantwini abangonanga lutho. Lokhu sisakhumbula okwenzakala ngesikhathi kulomhlangano wemkokheli yeSADC kwele Tanzania ngenyanga ephelileyo okwasekuthunjwa abantu mahlayana eZimbabwe.”
UMoyo uthi le yimisebenzi yabantu abazonda uhulumende kaMnangagwa.
“… Lokhu kwenzelwa ukuyangisa uhulumende emhlabeni wonke jikelele. Sileqiniso lokuthi ukuthunjwa kuka Dokotela Magombeyi bekusenzelwa ukuthi kuhambelane lokwethekelela kwele Zimbabwe kwesithunywa senhlanganiso yeUnited Nations esikhangelane lelungelo likazulu, ukukhululeka kanye lokwenza imihlangano.”
Isithunywa lesi, uMnu. Voule uzabe ekwele Zimbabwe kusukela namuhla kuze kuyefika phose ekucineni kuka Mpandula. Uzehlolisisa okwenzakala elizweni okwamanje.
UMoyo uthi ngakho-ke ukuthunjwa kuka Moyo kwenziwe ngendlela elakho ukuthi kuchothozwe ubudlelwano bukahulumende lozulu njengoba kuqala umhlangano omkhulu oweUnited Nations General Assembly namuhla.
“Abanye abantu bafuna ukuthatha ithuba leli ukuthi batshaphaze uhulumende. Abakhangelane lezomvikela bangeke bathumba umuntu ngezikhathi uhulumende ezama ukulungisa isithunzi selizwe. Amapholisa athi azadinga uDokotela Magombeyi yonke indawo baze bamthole.”
Sokuthunjwe abantu abafika amatshumi amahlanu lonyaka. Banengi abathunjwa kusukela ngesikhathi sombhuqazwe weGukurahundi.
Abakunhlanganiso ezitshiyeneyo bathi uhulumende usenga ezimithiyo ngoba ujayele ukungadingi izikliwi ezithumba abantu.