Udaba oluphanyekwe yiSouth Africa edale le-International Court of Justice isethesa i-Israel umlandu wokwenza umbuqazwe eGaza luqale ukuthonisiswa ngeLwesine.
ISouth Africa ifuna ukuthi lelidale limise impi eGaza, lapho i-Israel efuna ukuqeda khona ibutho leHamas elafakwa kuluhlu lwamalwecatsha adlulisa amalawulo yiMelika, EU lamanye amazwe kulandela ukuhlasela kwalo eIsrael ngoMfumfu nyakenye e-Israel.
I-Israel yona iyawulandula lumlandu.Inhloko kaHulumende we-Israeli Umnu Benjamin Netanyahu izolo uthe amabutho akhe azama ngazo zonke indlela ukuvikela abantu abangahlomanga njalo esethesa ibutho leHamas umlandu wokucatsha ngabantu abamsulwa kulimpi.
IMelika, ehlala ikhuthaza i-Israel ukuthi ivikele abantukazana eGaza layo iphikisana lodaba oluphanyekwe yiSouth Africa edale.
IHamas yabulala abantu abedlula inkulungwane (1,200) eIsrael ngoMfumfu njalo yathumba abantu abangamakhulu amabili lamatshumi amane (240), abayingxenye yalaba bantu sebekhululiwe.
Uhlangothi lwezempilakahle olukhokhelwa yiHamas eGaza luthi ukuhlasela kwe-Israel kulimpi sekubulalise amaPhalestina edlula inkulungwane ezingamatshumi amabili (23 300), yabhidliza izakhiwo njalo abantu abanengi bengasela mizi.
Ekhuluma leStudio7 ngaloludaba uMnu Nhlanhla Ncube ingcwethi yezombusazwe njalo engunobhala jikelele webandla leFreedom Alliance uthe okwenziwe yiSouth Africa kuyinto enhle okufanele ikwenze njalo kundaba zokwephulwa kwamalungelo eZimbabwe lakwamanye amazwe eAfrica.
Forum