EleZimbabwe lenelise ukuthengisa amadayimana akoChiadzwa angama carats phose isigidi- 900,000 carats, emkambo owenzelwe eHarare International Airport, ngolweSithathu.
Amadayimana la athengiswe ngemva kwemvumo ephiwe eleZimbabwe yinhlanganiso ebona ngamadayimana emhlabeni jikelele eyeKimberly Process. Isikhonzi senhlanganiso le uMnu Abbey Chikane ubekhona laye ukuzogcwalisisa isivumelwano lesi.
Abavela emazweni agoqela iMelika, Bhilithane, Belgium, Russia, India, Israel lamanye bathenge amadayimana la. Umkambo olandelayo wokuthengisa amadayimana akoChiadzwa ukhangelelwe ukwenziwa ngenyanga ezayo.
Kodwa inengi elizweni alilathemba lokuthi inzuzo yamadayimana la izaphathisa ukuthuthukisa inotho yelizwe ngoba abebandla leZANU PF betshengise ukungathembeki okwesikhathi eside.
Kodwa inkampani elodumo eye Ernst and Young yiyo ephiwe umthwalo wokukhangela imali engenileyo ekuthengisweni kwamadayimana la.
UBrenda Moyo weStudio 7 uxhume ingcwethi ecubungula ezombusazwe uMnu Bhekilizwe Ndlovu isiphathamandla senhlanganiso ethiwa Union for Sustainable Democracy osipha imibono yakhe ngaloludaba lwamadayimana.
