Ukuphatheka kukaMnu Nelson Chamisa labanye bakhe bebandla leMDC-T kanye lomkhokheli weTransform Zimbabwe uMnu Jacob Ngarivume emkhosini wokuthakazelela ilanga likazibuse sokuphehle umbuzo omkhulu othi kungaqinisa ukuthula phakathi kwabasekeli beZanu PF labamabandla aphikisayo ngaphambilini kokhetho na?
Sixhume ingcwethi ehlaziya ezombusazwe uMnu Effie Dlela Ncube.
Kunjalo nje, ezinye izakhamizi zakoBulawayo zithi ilanga lokunanza uzibuse lusuku nje oluveza ukuthi sekwedlule imnyaka phose engamatshumi amane kungela kukhululeka.
Lokhu kuphume emhlanganweni oqhutshwe yinhlanganiso elwela ilunelo loluntu eye Bhetshulikazulu ngaphansi kwendikimba ethi “38 years of Independence without Freedom”.
Umgcinisihlalo wenhlanganiso le umnumzana Melusi Sibanda uthi umhlangano lo bawenze ngemva kokunanzelela ukuthi ilizwe lathola uzibuse kodwa uzulu kakhululekanga.
Omunye wezikhulumi umnumzana Joshua Mhambi uthi njengesizwe kumele kusetshenzwe gadalala ukuthi uzulu weZimbabwe amanyane.
Umnumzana Matthew Sibanda obemele ibandla leZAPU uthe ilizwe lathathwa ezandleni zombuso wabamhlophe kodwa uhlupho yikuthi akula nkululeko elizweni ikakhulu emhlubulweni weMatabeleland
Osakhulayo obekulo umhlangano, umnumzana Lizwilenkosi Ndlovu uthi ilizwe leli liyindalo yabamhlophe abahlanganisa iMashonaland leMatabeleland, ethi iMatabeleland ayikatholi inkululeko.
Isakhamuzi sakoBulawayo umnumzana Reason Mpofu uthi inkululeko yokuchelesa ayikabikhona laloba uzibuse watholakala kudala.
