Inhlanganiso ezilwela ilungelo labesifazane ziyalusola udlakela phakathi kwabesifazane, besetshenziswa ngabesilisa, njengalokho okwenzakala kuZanu PF. Abesifazana bakhuthazwa ukuba balimuke babone obasebenzisa ukuqhuba lolo dlakela kwabanye babo, badinge njalo indlela zokuguqula inqondo ezibeka owesilisa njengomuntu onguye yedwa owanelisa ukukhokhela, basekelane lokuthuthukisa abanye babo ukuthatha lezo zikhundla.
Lokhu kuphume emhlanganweni lentathelizindaba owenziwe zinhlanganiso eziyisithupha ezisebenza ndawonye kumanyano wokuthuthukisa inhlelo zokusebenzelana kwabesifazane ekuthini baphatheke labo enhlelweni ezikhankasela ukuthula elizweni.
Inhlanganiso ezikulumanyano zibalisa i-Musasa Project, The Women’s Trust, Female Students’ Network, Nyahunure Community Trust, Zimbabwe Young Women Network for Peace Building kanye leye Padare/Enkundleni Men’s Forum eziqhuba limikhankaso ngokuphathiswa ngabenhlanganiso ye Diakonia.
Omqondisi we Musasa Project unkosazana Netty Musanhu uveze ukuba kuyinto edanisayo ukuba bayavuma ukusetshenziswa abesifazane, belwisana bodwa, bengananzeleli ukuba baqhubekisela phambili izifiso zabesilisa.
Unkosazana Jane Moyo ngomunye walabo abekade bekulomhlangano eze njengesakhamuzi se Harare engamelanga nhlanganiso. Uthi uMaMoyo okudanisayo yikuba bukhona ubandlululo enhlelweni eziqhutshwa kunhlangothi ezehlukeneyo zelizwe, bengekho abesifazana okumele babe khona lapho kuhlelwa inhlelo eziqondane labo.
Uqhubeka ethi ulethemba lokuba izaba khona inguquko kulokho kubandlululana ngesikhathi lezinhlanganiso ziqhuba inhlelo zazo kakhulukazi ngalesi sikhathi kuqhutshwa imikhankaso yokuluqeda udlakela phakathi kwabesilisa labesifazane lwe 16 Days of Activism Against Gender Based Violence.
Lumhlangano lentathelizindaba uza njengezinye zenhlelo eziqoqwe ngaphansi kwemikhankaso yensuku ezilitshumi lasithupha, yokulwisana lokuqedwa kodlakela phakathi kwabesilisa labesifazane.
Ziveze njalo lezi nhlanganiso ukuba umhlangano wamazwe awezansi yezwekazi leAfrica eye SADC wenziwa kusasa, ngenjongo yokubonisana phezu kokwenzakela enhlelweni zokukhankasela ukuphatheka kowesifazane endabeni zokulondoloza ukuthula.
Ubikwa lumhlangano uzakuphathisa ekuphumeni lezinqumo ezizanikezwa inkokheli zamazwe ukuze zingene kulezo ezizakwethulwa emhlanganweni wamazwe womhlaba phezu kwesimo sabesifazane owe 59th Session of the UN Commission on the Status of Woment, ozaqhutshwa ngoMbimbitho womnyaka ozayo, lapho kuhlaziywa okuphezu kosekuthe kwenziwa ukulandela izinqumo ezenziwa phansi kwesivumelwano se Beijing Declaration and Platform for Action – BDPFA.