Umphathintambo obona ngezisebenzi zikahulumende uMnu. Elphas Mukonoweshuro izolo usole iziphathamandla ezingenela emsebenzini yezinye ethi ukwenza kanje yikuphazamiselana imisebenzi njalo kulakho ukuphazamisa uzulu.
Kusenjalo, izisebenzi, zona eziphakathi kokuxoxisana lohulumende ngodaba lokwengezelelwa iholo zisola uMnu. Biti zisithi akusumlandu wakhe ukuthi anike isinqumo ngokungengezelelwa kweholo lazo, kodwa ngumlandu ka Mnu. Eliphas Mukonoweshuro umqhatshi wabo. Omunye walezizisebenzi, uMnu. Sifiso Ndlovu, isiphathamandla senhlanganiso elwela amalungelo ababalisi eye Zimbabwe Teachers’ Association, utshele uSithandekile Mhlanga we Studio 7 ukuthi bona basekela amazwi ka Mnu. Tsvangirai lo Mnu. Mukonoweshuro, hatshi aka Mnu. Biti.
Izisebenzi ezikuhlangothi lwezokuthwalwa kwabantu lempahla olwe Transport and General Workers’ Union kanye labaqhatshi babo sebehlulene kumbango wokuthi abaqhatshi balandele isinqumo somthethwandaba sokuthi bakhweze iholo ngesilinganiso samakhulu ayisitshiyagalombili ekhulwini-80%, kusukela ngoMbimbitho womnyaka ophelileyo abaqhatshi besithi abangeke banelisa ukubhadala leyomali njalo abanengi babo sebehambise loludaba e Supreme Court befuna ukuthi kwesulwe lesisinqumo.
