Inhlanganiso elwela ilungelo loluntu emhlabeni jikelele, eye Amnesty International ithi yamukela ngokuthokoza ukuthi isiphathamandla secele le MDC elikhokhelwa nguMnu. Morgan Tsvangirai, uMnu. Roy Bennett sifunyenwe singelacala lokuzama ukugenqula umbuso ka Mongameli Robert Mugabe ngumthethwandaba waphezulu ngoMvulo, kodwa ilokhu ikhathazeka ngendlela abantu abaphikisana lombuso kaMugabe abaphathwa ngayo elizweni.
Ezinye njalo inhlanganiso ezilwela ilungelo loluntu, ezigoqela i Zimbabwe Peace Project, lazo zincome isinqumo somthethwandaba waphezulu, kodwa ezinye iziphathamandla ze ZANU PF zibikwa zingafuni ukusamukela lesisinqumo.
Umsekeli wesikhulumi salelibandla uNkosazana Thabitha Khumalo, utshele uSithandekile Mhlanga we Studio 7 ukuthi bakhangelele ukuthi Umnu. Bennett afungiswe, athathe isikhundla ebesimlindele esokuba ngumsekeli ka mphathintambo kahulumende obona ngezokulima.
UMakhumalo uphikile ukuthi kulengxabano phakathi kwebandla lakhe ngesikhundla sika Mnu. Bennett.
