Amalunga enhlanganiso zikazulu kwele South Africa afole ngoLwesine lezizalwane zakwamanye amazwe ezihlala kulelo lizwe emkhankasweni wokulwisa impi yokucwasana ngobuzwe, iXenophobia.
Lokhu kulandela ukuhlaselwa kwabosomabhizimusi bakwamanye amazwe okuqale emzini weSoweto kwamemetheka kwezinye indawo elizweni kwabangela ukuthi izizalwane zakwamanye amazwe zibaleke emalokitshini.
Abaqoqe umkhankaso wangoLwesine batshele iStudio 7 ukuthi sebebhalele umongameli Jacob Zuma weleSouth Africa bekhuthaza ukujeziswa kwenkokheli zikahulumende ezikhwezela ukulwiswa kwabakwamanye amazwe.
Izizalwane zakwele South Africa labakwamanye amazwe abafole ezitaladeni zeJohannesburg, bebecula, begida kanye lokupha uzulu amaphetshana akhuthaza ukuphela kwempi yokucwasana ngobuzwe.
Omunye wenhlanganiso eziqoqe umkhankaso walamhlanje umnumnzana Trevor Ngwane owenhlanganiso ye United Front, uthi ukuphatheka kwenhlanganiso zakwele South Africa kulo umkhankaso kukhombisa sobala ukuthi kakusibo bonke abantu kulei abavumelana lokulwiswa kwezizalwane zakwamanye amazwe.
Nkosazana Jane Letlhafu yisizalwane sakweleSouth Africa esihlala elokitshini leSoweto, lapho okuqhamuke khona ukulwiswa kwabosomabhizimusi bakwamanye amazwe. Yenake akavumelani lokuzondana kwabantu abamnyama. Unkosazana Letlhafu ukhuthaze izizalwane zakwele South Africa ukuthi zingakhohlwa ukuthi ezikwenza kwabanye sekungezeka lakuzo nxa zisethekelele kwamanye amazwe.
Unobhala jikelele wenhlanganiso yomanyano wezisebenzi kwele South Africa umnumnzana Zwelinzima Vavi laye ubeyingxenye yomkhankaso walamhlanje. Umnumnzana Vavi utshele iStudio 7 ukuthi elimqotho ngelokuthi indlala, ukusweleka kwemisebenzi lobuyanga yizo izitha ezinkulu ebantwini bakwele South Africa hatshi izizalwane zakwamanye amazwe.
Abebekhankasa laba okugoqela lezizalwane zeZimbabwe, lezinye inhlanganiso zabakwamanye amazwe eziphansi kwenhlanganiso ye African Diaspora Forum, bathi sebebhalele umongameli Jacob Zuma ukuthi angenele edabeni lokuhlaselwa kwabakwamanye amazwe mahlayana.