Obengumabhalane wekhansili yakoBulawayo uMnu Middleton Nyoni, yena obhubhe ngeSonto, ungcwatshiwe namuhla eLady Stanley Cemetery kulelidolobho.
UMnu Nyoni ubeseleminyaka yokuzalwa engamatshumi ayisithupha lambili njalo ubikwa edliwe ngumkhuhlane wemvukuzane. Abakhulume emngcwabeni wakhe, bagoqela uMayor wedolobho leli uMnu Martin Moyo ochaze uNyoni njengo mkhokheli obelohlonzi.
UMoyo uqhubeke ethi idolobho lakoBulawayo lilahlekelwe kakhulu ngokubhubha kukaNyoni njengoba ubengumuntu obelesifiso sokufuna ukubona intuthuko yaleli dolobho ngakhoke bekule nhlelo lemisebenzi abakade beyihlele bebonke ebidinga ukuthi ngabe ube khona.
Lalowo ozathatha isikhundla sakhe uMoyo uthi kuzaba nzima ukudinga umuntu ongenelisa ukusebenza ngendlela langezinga laphezulu umuyi akade esebenza ngayo.
“Ngaphandle kokulahlekelwa ngumkhokheli obe nguye umtshayeli wenhlelo zonke zekhansili yakoBulawayo, silahlekelwe ngumuntu obengasenguye umuntu nje esisebenza laye, kodwa ubesengumngane”, kutsho uMoyo.
