Isikhathi sokhetho sijayele ukubuya le mivuzo esuka kubandla elibusayo, lizama ukukhanga abantu ukuthi balivotele. Kodwa eZimbabwe, ngesikhathi ilizwe lilungiselela ukuvota mhlaka 30 Ntulikazi, isimo siqhubeka sisiba lukhuni, abanye belokhe bengena kweleBotswana ukuyathenga imphahla yendlini yona elokhe idula okwamagama.
Kwabalokujabula ezitaledeni zamadolobheni afana leHarare kanye lakoBulawayo ngesikhathi uhulumende kamongameli Emmerson Mnangagwa ehluthunela owayengumongameli Robert Mugabe intambo zombuso.
Kodwa kwathi kusanda ukungena inkokheli entsha, kwahle kwaqonga intengo yemphahla, njalo udubo lokusilela kwemali lwaqhubeka ngamandla.
Inengi lalicabangela ukuthi mhlawumbe isimo sizaguquka, abanye abaseduze lamadolobo afana leFrancistown eBotswana, bame ukungena komakhelwane besiyadinga ngitsho imphahla encane okufana lokudla.
Sekwedlule inyanga eziyisikhombisa, kodwa imali lokhe isilela, izihlobo labangane abaphandle kwelizwe lokhe bethumela imali lokudla kukanti intengo yemphahla nje, ilokhe iphezulu.
UMnu. Andreas Sibanda uthi kuyadanisa ukuthi njengezihlobo ngaphandle kwelizwe, lokhe bethumela imali kanye lemphahla ekhaya.
Kutsho uSibanda: “Isimo sakhona asimanga kuhle ngoba ungakhangela lokhe sithumela imali lemphahla ekhaya. Imali yakhona futhi abayitholi ngesikhathi kukanti bakhangelani lokukhwela kwe ntengo yamafutha emote. Kutsho akulantshintsho olunengi.”
Umnunzana Mthabisi Dube uthi ngesikhathi sokhetho kumele ukuthi ngabe ibandla elibusayo selenze imizamo ukulungisa okanakeleyo, kodwa kuyadanisa okukhona.
“Kuyasidanisa ukuthi lokhe ukuthi lokhe sithenge imphahla phandle. Ithemba kwakuyikuthi ngesikhathi lesi kuzabe sekugcono kodwa asikawuboni umehluko,” kutsho uDube.
Umnunzana Rodwell Moyo, yena uthenga imphahla edolobheni leGaborone, uthi ukuthaba abakade belakho bekhangele ukuthi mhlawumbe kuzaba lenguquko ukhetho lungakafiki, sekutshabalele, ikakhulu endabeni ezithinta inhlalakahle kazulu.
“Ukuthaba akade silakho sekuphange kwaphela, besikhangelele ukuthi intengo yokudla lokuphila kwabantu, kodwa lokhe kukhwela kusiya phezulu,” kutsho uMoyo.
Abanye abafana lomnunzana Nkazimulo Khanye bathi kumgceke ukuthi akula ‘manna’ abazayithola lonyaka, njengokujwayekileyo kwamanye amazwe ngesikhathi sokhetho.
“Kujwayelekile ukuthi ngesikhathi sokhetho kube lalokhu okuthiwa ngama election promises, ukuzama ukhanga abantu ukuze bavote. Besikhangelele ukuthi uhulumende kaMnangagwa uzalungisa okufana lokusililela kwemali, kuyindlela yokukhanga abazavota. Kodwa kukhanya imanna ebuya ngesikhathi sokhetho, isisiyeqile,” kutsho uKhanye.
NgoLwesithathu umongameli Mnangagwa wazise ukuba ukhetho luzabanjwa mhlaka 30 Ntulikazi, ekhanya elethemba lokuthi uzanqoba, noma nje kulokukhonona ukuthi ukungena kukahulumende omutsha akukaqumba qumbi umnotho ngendlela inengi ebilikhangelele ngalo. Intengo yamafutha ezimota isanda kubikwa ukuthi izaqonga, okulakho ukubangela ukuthi intengo yezinye imphahla layo ikhuphuke.
Inengi belikhangele ukuthi uhulumende kaMnangangwa kasoke afune ukuthi kuyengenwa kukhetho okunye okufana lokusilela kwemali kanye loku qonga kwentengo, kungakalungiswa.
Kodwa kukhanya kumele baqonde emabhokisini lapho abazavotela khona, belokhe bebhekane lenhlupho ezifana lokuswelakala kwemali, amathuba emsebenzi kanye lokuqonga kwentengo yemphahla.
