Owayengumeli weZengeza West edale lePhalemende njalo elilunga lebandla eliphikisayo eleCCC uMnu Job Sikhala lomunye wakhe uMnu Godfrey Sithole, owayemela isigaba seChitungwiza North edale elifanayo bafunyanwe ngumthethwandaba kamantshi weHarare ngoLwesithathu belecala lokutshotshozela udlakela eNyatsime ngomnyaka ka2022 kulandela ukubulawa kwelunga lebandla labo uNkosikazi Moreblessing Ali.
Bekunyakazela enkantolo kaMantshi eRotten Row kugcwele abasekeli beCCC kanye lozulu jikelele besithi uSikhala, yena osevalelwe okweminyaka phose emibili, 1 year 8 months, kumele akhuluwe.
Kodwa umantshi uNkosikazi Tafadzwa Mhiti unqume ukuthi ubufakazi obethulwe ngabatshutshisi buveze ukuthi ngempela uSikhala loSithole batshotshozela abantu ukuthi benze udlakela eNyatsime kulandela ukubulawa komsekeli weCCC uNkosikazi Moreblessing Ali lilunga leZanu PF uPius Jamba, yena osowagwetshwa ukudonsa iminyaka engamatshumi amathathu, 30 years, ejele phezu kwalelicala.
Umantshi uthe ubufakazi lobu bukhomba ukuthi uSikhala loSithole yibo abaqoqa amabhasi athwala abantu abenza udlakela emfeni kaAli.
Wengeze wathi njengabantu ababengamalanga ePhalamende njalo besezikhundleni zobukhokheli kuCCC, kwakumele ababili laba beziphathe ngcono ngendlela ekhuthaza ukuthula.
Ngokunjalo uthe uzagweba uSikhala loSithole ngoMvulo ozayo mhlaka.
Ekhuluma lentathelizindaba ephuma emthethwandaba, ngemva kokuthethwa kodaba lolu, elinye lamagqwetha kaSikhala, uMnu Harrison Nkomo uchasise ngokwenzakeleyo namhlanje.
UNkomo uqhubeke esithi bazaluphanyeka emthethwandaba waphezulu oweHigh Court loludaba, bephikisa ukufunyanwa kwababili laba belecala kanye lesigwebo abazasetheswa.
Umsekeli wesikhulumeli seCCC uMnu Gift Ostallos Siziba yena uthe njengebandla badane kakhulu ngesinqumo sikamantshi lesi.
Lokhu kusekelwe lilunga leJob Sikhala Solidarity Movement, uMnu Comfort Mpofu yena othi iZanu PF yiyo ebangela lokhu okwenzakala kuSikhala.
Kodwa isikhulumeli seZANU PF uMnu Farai Marapira ukulandule lokhu esithi uSikhala kumele amelane lamacala akhe.
Kusenjalo, ssisathathwanga isinqumo kwelinye icala eletheswa uSikhala elokuloba amanga enkundleni yeFacebook lapho abikwa wabhala ukuthi amapholisa abulala umntwana omncane ngemva kwemibiko ayeyethule enkundleni zokuxhumana ezebulenjini.
Umthethwandaba uthe uzakwethula isinqumo sawo mhlaka 7 ngenyanga ezayo ngoba abatshutshisi bethe bebengakalungisisi amaphepha abo ukuze udaba lolu luphethwe ngoLwesithathu.
USikhala uyalilandula icala leli esithi yena kakho lokuba khona enkundleni yeFacebook.
Ngesikhathi udaba lolu luthoniswa nguMantshi uFeresi Chakanyuka namhlanje ekuseni kulabasekeli beCCC abatshengisele phambi komthethwandaba besithi uSikhala kumele akhululwe.
USikhala usencitshe ithuba lokukhululwa ngemali yesibambiso, i-bail kanengi, okwenze wahlala isikhathi sonke lesi esifika phose iminyaka emibili evalelwe.
Njengoba esetholakale elecala, akwaziwa ukuthi uzaqhubeka evalelwe njalo okwesikhathi esinganani lanxa engaze ephikise ukufunyanwa kwakhe elecala eHigh Court.
Forum