Umphathintambo obona ngezemali uMnu Patrick Chinamasa ngoLwesine wethule uhlelo lwemali kahulumende olubiza amabillion amane ($4billion).
Esethula ibudget le edale lephalamende, uMnu Chinamasa uthe uhlangothi lwezokulima, lona olungumgogodla womnotho welizwe, lokhe lungaqhubi kuhle.
Uveze njalo ukuthi umnotho uzathuthuka ngesilinganiso phose sokuthathu ekhulwini (2,7 percent), kodwa ukhale ngokuqonga kwesilinganiso sendleko yeholo lezisebenzi zikahulumende.
Ekhuluma ngokuguquka komkhathi, uChinamasa uthe inguquko le isiphazamise kakhulu uhlangothi lwezokulima.
Wengeza wathi uhulumende uzaphathisa abalimi botshinda ngemali kanye lezinto zokulimisa eminyakeni emithathu elandelayo kungela mbadalo.
Kodwa abanye basole kakhulu uMnu Chinamasa besithi akula nguquko ayenzileyo ku-budget ka2016 nxa kuqathaniswa leka2015.
Omunye wabantu laba nguMnu Mlondolozi Ndlovu yena otshele iStudio 7 ukuthi kusobala ukuba uzulu uzakuqhubeka ebhakane lobunzima.
Imali enengi izasetshenziswa ukubhadala izisebenzi zikahulumende.
Kunjalo nje, ingcwtehi kwezenothu uMnu Masimba Kuchera athi akula bubelo obuzalethwa yibudget kaChinamasa embilweni kazulu.
Amazwi akhe agcizelelwe yisiphathamandla sebandla lePeople's Democratic Party uMnu Fortune Mlalazi.