Uhulumende weMelika wazise ukuthi izijeziso azethulela iZimbabwe zizaqhubeka zikhona ngoba ukuhlukuluzwa kukazulu lokwephulwa kwamalungelo akhe kungakapheli. Lokhu kuphume kunkulumo ezibe khona ngolweSine phakathi kweziphathamandla zeMelika lequla leZimbabwe ele Re-engagement committee.Inkulumo lezi ziqhutshelwe eNew York eMelika. Iqula leZimbabwe likhalaza ngokuthi iMelika yesule izijeziso lezi.
Iqula leZimbabwe libunjwa nguNkosikazi Priscilla Misihairambwi-Mushonga oweMDC ekhokhelwa nguMnu Arthur Mutambara, uMnu Patrick Chinamasa oweZANU PF loMnu Elton Mangoma owecele leMDC elikhokhelwa nguMnu Morgan Tsvangirai.
Ekhuluma leStudio 7, umsekeli kanobhala obona ngobudlelwano beMelika lamazwe eAfrica uNkosikazi Susan Page uthe iMelika ifuna kube lenguquko eqinileyo kwezokulondolozwa kwamalungelo oluntu andubana yesule lezi zijeziso.
uNtungamili Nkomo oweStudio 7 uxhume uNkosikazi Priscilla Misihairambwi-Mushonga wachasisa ngohambo lwabo.
Ngakwelinye icele inkokheli yamazwe eAfrica iqhubeka itshengisa usekelo lwayo kuMongameli Robert Mugabe ngokucela amazwe angentshonalanga ukuthi esule izijeziso ezafakelwa uMugabe labanye bakhe kubandla leZANU PF.
Ekhuluma emhlanganweni weUnited Nations general assembly uMongameli Bingu Wa Mutharika wakwele Malawi ukhuthaze ukuthi izijeziso zesulwe esithi izizatho ezafakelwa izijeziso lezi azisasebenzi, sezedlula.
Kodwa amazwe angentshonalanga la athi kumele kuqale kube lenguquko elizweni kuhlonitshwe ilungelo loluntu.
UBrenda Moyo weStudio 7 ukhulume lengcwethi ecubungula ezombusazwe uMmnu George Mkhwanazi othi inkokheli yeAfrica ikhanya ingazi umonakalo odalwe nguMugabe kwele Zimbabwe.
