Uhulumende weZimbabwe sehlise imbadalo yamapassport isuka kumadollar eMelika edlula kancane alikhulu lamatshumi amane –US$143 yafika kumadollar angamatshumi amahlanu US $50.
Umbiko lo wethulwe eHarare ngolweSithathu ngabaphathintambo bogatsha lwezaphakathi kwelizwe uMnumzana Kembo Mohadi loNkosikazi Theressa Makoni emhlanganweni lentathelizindaba.
Ababili laba bakhuthaze izizalwane zeZimbabwe ezihlala eSouth Africa ezingela mapassport ukuthi zihle zithathele phezulu udaba lwamapassport ukuze zilungisise ingwalo zokuhlala kwele South Africa.
I US $50 le ngeye passport ethatha amaviki amathathu kusiya kunyanga eyodwa ukuphuma. Imbadalo yepassport ethatha amalanga amathathu kusiya kwamahlanu ilokhe ingeyamadollar edlula amakhulu amabili-US$253, kuthi ephuma ngelanga elilodwa ilokhe ingedlula amakhulu amathathu kancane iUS$318. Abaphathintambo bezaphakathi kwelizwe bazise njalo ukuthi akusela nhlawulo kulabo abalahla amapassport akade behlawuliswa amadollar eMelika angamakhulu amane-$400.
UBrenda Moyo weStudio 7 ukhulume lesiphathamandla sebandla leMDC elikhokhelwa nguMnumzana Arthur Mutambara eSouth Africa, uMnumzana Ngqabutho Dube othi leli linyathelo elihle elizakwenza umthwalo ubelula kuzizalwane zeZimbabwe ezise South Africa ezidinga amapassport.
UBrenda uphinde wakhuluma loNkosazana Sheilla Mthupha isakhamuzi seNkulumane koBulawayo othi laye usezakuyathatha ipassport njengoba intengo isiyehlile.
