Uhulumende weBhilithani usenike ikhansili yakoBulawayo izigidi ezintathu lengxenye zempondo-£3.5 million, ukulungisa imitshina yokuhlanza amanzi okunatha eCriterion Water Supply Resevoir kanye lokuvuselela izambuzi ezikolo ezitshiyeneyo.
Ummeli weBhilithani eZimbabwe, uNkosazana Deborah Bronnert, wethule lokhu ngemva kokuvakatshela eCriterion lamhla ekuseni ukuyahlola imitshina esetshenziswa kulindawo. Uthi kusukela nyakenye ngoMbimbitho kuzofika lamhla iBhilithani isikhiphe izigidi ezintathu lengxenye zempondo-£3.5 million ngaphansi kohlelo lokusiza lelidolobho, iBulawayo Emergency Water Augmentation Programme.
UNkosazana Bronnert, obekuhambo lwakhe lokucina anduba aphindele elizweni lakhe, uthi ngokunceda ukuhlanza amanzi akuleli dolobho bazama ukuthi umkhuhlane wesihudo ungaphindi uqhamuke kulumhlubulo welizwe.
Ohlaziya ukuhlalisana kukazulu, uMnumzana Donald Khumalo, uthi uncedo uBulawayo alutholayo luyakhwabitheka okwamagama kodwa udubo lwamanzi kanye lezinye inhlupho ezibhekane loBulawayo zibangelwa yikuswelakala kohlelo lokusa amandla okuzibusa kuzabelo. Uthi kudala uBulawayo wakhala ngodaba lokusilela kwamadamu kodwa isigaba seMasvingo sesize sakhelwa idamu phambi kwedolobho lakoBulawayo.
Uqhubeke ethi idolobho lakoBulawayo liyenelisa ukuzakhela amadamu nxa uhulumende engavuma ukulinika amandla okuzibusa ngoba wonke amadamu alelidolobho akhiwa yikhansili ngaphandle kweleMtshabezi okuyilo lodwa elakhiwa nguhulumende.
Isakhamuzi njalo engumqeqeshi kwelinye lamayunivesithi akuleli, uNkosazana Sihle Nyathi uthi lanxa abadala besithi umntwana ongakhaliyo ufela embelekweni, uBulawayo sekhale ezimathonsi kungela omuzwayo. Uthi sokufike isikhathi sokuthi izakhamizi zidinge amanye amacebo okuthuthukisa lelidolobho afana lokukhulumisana lamanye amazwe lokuphathisana labanye ohulumende abanjengeBhilithani ukuze kuvuselelwe idolobho hatshi ukumelela uhulumende wakuleli ongaphathisi ngalutho.
Ngaphansi kohlelo lweBulawayo Emergency Water Augmentation programme, iBhilithani ngohlangothi lwayo lwe Department for International Aid (DFID), ilungise izambuzi ezikolo phose amatshumi amahlanu – 46 lemakiliniki ekhansili amahlanu. Ifake njalo amatanka amanzi alungisa lempompi zokuhambisa ingcekeza osokusize abantu abazinkulungwane ezingamatshumi ayisithupha – 60 000.