Umphathintambo wezemigodi uMnu. Obert Mpofu uthi akulamankampani emazweni emba okutshiyeneyo eZimbabwe azavalwa ngenxa yokungalandeli iziqondiso zomthetho wokwabelana amashares amankampani emazweni kuhlelo lwe indigenization.
UMpofu okhulume lamazwi ngoLwesithathu emhlanganweni omkhulu wabakumsebenzi wokwemba okutshiyeneyo owenzelwa eHarare uthe kungeke kwenzakale ukuthi umphathintambo wezabatsha lokuthuthukisa inotho kazulu, uMnu. Saviour Kasukuwere avale imigodi engalandeli iziqondiso zomthetho wohlelo lweIndigenization.
Uqhubeke wathi ulethemba lokuthi uKasukuwere labaqondisi bamankampani atshiyeneyo bazakhulumisana kahle ngokwabela uzulu amashares amankampani la laloba nje engaluthakazeleli uhlelo lolu.
UKasukuwere usanda kwethusela iBlanket Mine kanye le Zimbabwe Platinum Holdings ukuthi uzawavala ngenxa yokuthi afuna ukwabela uzulu amashares angaphansi kwesilinganiso sokungamatshumi amahlanu lanye ekhulwini-51%, okufunwa nguhulumende.
Ezinye iziphathamandla zikahulumende ezismhlanganweni lo ezinjengo Mnu. Tapiwa Mashakada zithi uhulumende kumele aluqhube kahle uhlelo lweIndigenization ngoba nxa lungaphathwanga kuhle lulakho ukubhidliza inotho yelizwe njalo labafuna ukuvula amafekithali eZimbabwe becine bengasela sifiso ledlabuzane lokuvula amafekithali elizweni leli.
UMashakada uphinde wathi abantu bemazweni sebefake izigidi ezedlula amakhulu amabili lamatshumi ayisithupha zamadola eMelika-$260million, emsbenzini wokwemba okutshiyeneyo eZimbabwe lonyaka kuphela okutshengisa ukuthi kulokuthuthuka okwamagama emsebenzini wezemigodi.
Ingcwethi kwezombusazwe lezenotho uMnu. Rejoice Ngwenya uthi okukhulunywe nguMpofu kungeke kwathenjwa ngabaqondisi bamankampani ngaphandle uhulumende aze alobe ugwalo olutsha olutshengisa ukuthi uhlelo lweIndigenization kalusoze lwenze ukuthi imigodi lamanye amankampani emazweni kwele Zimbabwe avalwe.
