Uhulumende wakwele South Africa ubikwa elobelane izivumelwane ezine lohulumende we Zimbabwe ezijonge ukuvuselela ukusebenzelana kwamazwe womabili.
Lokhu kwenzakale izolo kuhambo lukamongameli Mugabe obese South Africa lequla lakhe. Umongameli Mugabe wazise njalo ukuthi uhulumende wakhe uzaqhubekela phambili ngokuthatha amapulazi abelungu.
Ududuze ele South Africa ebeliphatheke ngodaba lokususa isithombe sowayengumkhokheli wabahuquluzi benotho, uMnu. Cecil John Rhodes esithi eleZimbabwe yilo elilamathambo akhe.
Izivumelwano ezilotshiweyo zigoqela esamanzi, esokuthengiselana lesomvikela. Ukuhlaziya uhambo luka Mugabe uChris Gande weStudio Seven uxoxe lengcwethi ecungula ezombusazwe, uMnu. George Mkhwananzi endawonye lolunga le Central Committee yebandla le Zanu PF, uMnu. Joseph Tshuma onguye osungula lingxoxo.
