Umnu. Tendai Biti umphathintambo wezemali uthi sokuzavulwa iwofisi eHarare yokuhlolisisa lokudinga indlela zokuhlawula isikwelede selizwe samabillion phose ayisikhombisaamadollar eMelika-US$6.7 billion.
Esethula uhlelo lwakhe lwe Mid-term Fiscal Policy Review, uBiti uthe iziphathamandla zewofisi le zikhangelelwe ukukhulumisana lenhlanganiso okumele zihlawulwe, ezigoqela iWorld Bank, International Monetary Fund kanye le African Development Bank.
Uphinde wathi iwofisi le kumele idinge amaqhinga okusetshenziswa kwenotho yelizwe ngendlela ezakwenza yenelise ukuhlawulela lezi zikwelede eziyizo ezivimba iZimbabwe ukuthi ithole uncedo lwemali yokuthuthukisa inotho oluvela kwamanye amazwe.
Abacubungula ezenotho bathi kusobala ukuthi uBiti uzama ngamandla wonke ukuthi abhadale izikwelede zelizwe kodwa abanye bathi iwofisi le ezavulwa kayisoze incede lutho.
Eyinye yalezi ngcwethi uMnu. Rejoice Ngwenya utshele uGibbs Dube we Studio 7 ukuthi ele Zimbabwe kumele licele ukuthi izikwelede zalo zesulwe.
Kodwa-ke uMnu. Masimba Kuchera einye njalo ingcwethi ecubungula ezenotho uthi uBiti wenze kahle ukuthi kuvulwe iwofisi eHarare ezakhangelana lezikwelede zelizwe.
