Uhulumende uthi uzaqhubeka ebhadala izisebenzi zakhe imali yokuziphathisa besebenza ngesikhathi sokumelana lobhubhano lwe Covid-19. Izisebenzi zikwamukele lokhu kodwa zikhala ngokuthi kumele yengezwe ngoba ingozi lomanakalo odalwa yilo umkhuhlane lokhu uqela.
Kusukela ngenyanga kaNhlangula ngomnyaka ophelileyo uhulumende ubehlawula izisebenzi zakhe amadola eMelika angamatshumi ayisikhombisa lanhlanu-US$75, phezu kweholo lazo lensukwini kungakabiu leCovid 19.
Imbhadalo le ibikhangelelwe ukuba icine ngenyanga edlulileyo eka Mpalakazi kodwa uhulumende wethule umbiko wokuqhubekela phambili esipha izisebenzi zakhe leyi mali ngoba ilizwe lokhu liphakathi kokumelana lobhubhane lolu.
Umnumzana Enock Dongo umongameli wenhlanganiso yabongi eye Zimbabwe Nurses Association uthi bacela uhulumende ayengeze imali leyi.
"Siyakwamukela ukuqhubekela phambili kwembhadalo yegcikwane le Corona okuvela kuhulumende kodwa sikhalaza ukuthi uhulumende ayengeze imali leyi ukuze izisebenzi zanelise ukuphila. Ubhubhane lwe Covid-19 seluhlukuluze izisebenzi zikahulumende kanye lomnotho welizwe osokudale ukuba imali le ikhanye isingasayeneli kungakho sicela ukuba ikhuphulwe iyephezulu ukuze senelise ukuthi siphile.”
Lokhu kusekelwe ngumnumzana Anthony Majongosi umgcinisihlalo wenhlanganiso yabongi esibhedlela seUnited Bulawayo Hospitals.
“Siyabona ukuthi igovernment iyaqhubekela phambili isibhadala iCovid allowance lokhu siyakubonga. Kodwa sibona ukuthi imali leyi incane kuma workers agoqela ama nurse ngoba sisengozini, indawo esisebenzela khona umkhuhlane ugcwele khonapho asila zinto ezikwanileyo zokuzivikela. So sithi igovernment kufanele isiphe imali ekwanayo ngokukhweza imali leyi.”
Unkosikazi Sukoluhle Ndlovu umgcinisihlalo weMatabeleland North kunhlanganiso yababalisi eye Amalgamated Rural Teachers Union (ARTUZ) ngomunye wabathi lesi sinqumo kasila mehluko kangako ekuthuthukiseni impilo yabo.
“Lokhu thina akusiphathisi ngalutho ngoba sikhangele ukukhwezelwa umholo wethu ubuyele kumali esasiyihola elingana le US$540. I Covid-19 allowance leyi iyimali encane ma siyikhangela ngemali yethu yakuleli eZimbabwe, inyanga leyi ebuyayo nxa izikolo zizavulwa kulama school fees ngakho iyabe ingayeneli lutho. Kungakho sisithi imali yethu ibuyele kuleyi eka 2018.”
Umnumzana Effort Ncube umqondisi wenhlanganiso emele abathengi eye National Consumer Rights Association (NACORA) uthi imbhadalo le kayingapheleli kuzisebenzi zika hulumende kodwa wonke umuntu ophakathi kohlupho ngenxa yeCOVID kumele ayithole.
“Yebo kambe lanxa imali leyi kukuhle ukuthi izisebenzi zikahulumende ziyizuze kodwa incane kakhulu. Kudingeka imali enkulu kulaleyi nxa ukhangela izinto ukuthi zidula njani kube kuyi grocery lakhu okunye nje akula lutho olungaduliyo. Ngakho kufanele bayozuze imali leyi kodwa bayithole inengi njalo kungapheleli kibo kuphela itholwe ngabafelokazi, intandane, abantu abadala labanye bonke abaphakathi kohlupho kuyadingeka ukuthi bathole okungabancedisa ngesikhathi se Covid-19.”
Umphathintambo wezisebenzi zikahulumende usikhwicamfundo Paul Mavima ekhuluma ecingweni uchaze ukuba usethethe ikhefu lokuphumula ngokunjalo kenelisi ukuba akhulume ngalokhu okwenzakala kugatsha lwakhe. Kodwa esinye isiphathamandla kugatsha lwezisebenzi zikahulumende uAmbassador Jonathan Wutawunashe utshele iphephandaba le Herald izolo ukuba kusukela ngenyanga leyi kaZibandlela uhulumende uzaqhubeka ebhadala izisebenzi zakhe imali engangamadola angamatshumi ayisikhombisa lanhlanu eMelika, kuthi asebatahtha umhlalaphansi wempentsheni bathole imali engangamadola angamatshumi amathathu eMelika.
Ugcizelele ethi kodwa limali izabhadalwa ngedola leZimbabwe njalo izaqhubeka ibhadalwa izisebenzi uma ilokhe ikhona lokuba ubhubhane luzadonsa isikhathi esinganani.
Amadolobho amakhulu abalisa iHarare leBulawayo yiwo akhokhelayo ngokuba lenani eliphezulu labafunyanwa beleCovid 19 lokhe lumnyaka ka2021 uqalileyo. Kunje ngokutshona kwelanga layizolo eHarare kufunyenwe abantu abedlula amakhulu amane-401 belegcikwane leli.
Udokotela Rodgers Magigo uthi ukuvulwa kwemingcele lesiphithiphithi sekhisimusi yikho okungabe kubangele ukuba inani labafunyanwa beleCovid 19 liqonge.
“December 1 savula ama border abantu bangena ikakhulu abavela kwele South Africa abanengi bengena bengahlolwanga. Okwesibili sangena Ku Christmas saphithizela etown, emashops. Konke lokhu kubangele ukuthi ama cases ethu akwele, khathesi sesivuna ama results awalokhu. I behavior yethu, abantu bezitshela ukuthi akusela Covid bengagqoki ama mask so ngibona kuyikho okwengeza ama cases ethu. Okukhona khathesi ngama consequences awalokhu okwayenzakala kusukisela 1 December kuze kube khathesi.”
Kunje inani labantu abakhulelwe ngumkhuhlane we Covid-19, batshona lokhu likhuphuka okwethusayo. NgeSonto kubhubhe abantu abangamatshumi amabili lane-24, ngoMvulo kwaba ngamatshumu amabili lanye-21, izolo kwatholakala abangamatshumi amabili lantantu-23. Lokhu kukhweze inani lasebebulewe yi Corona selokhe liqhamuke elizweni nyakenye laya kumakhulu amahlanu lamatshumi amahlanu lanye-551.