Abazali abalabantwana abafunda ezikolo zemaphandleni eZansi yemaNdebeleni bathi bakhathazekile ngenyathelo likahulumende elokusungula inhlelo zemfundo ngamagagasi aweZBC besithi kawabambi endaweni ezinengi kulesisabelo.
Lanxa uhulumende esithi uzathumezela abafundi ingwalo emakhaya inengi lithi lokhu yikubandlululwa kwabafundi bemaphandleni ngoba kumele baphiwe amathuba alinganayo labasemadolobheni.
Abazali esixoxe labo bathi lanxa besekela inyathelo likahulumende lokuthi izifundo ziqhubeke ngesikhathi kuvalwe ilizwe ngohlelo lweLockdown, bakhathazekile ngendlela uhulumende afuna ukuqhuba ngayo loluhlelo ngoba luzadala ukuthi kuphumelele abafundi abasemadolobheni kumbe abaphuma ezimulini eziphakemeyo kuphela.
Abogatsha lwezemfundo bathi amalungiselelo okusungula uhlelo lokuthi abafundi bafunde ngomsakazo kanye lomabonakude weZBC kumbe ngezincwadi asekuzinga eliphezulu njalo akusensuku zatshwala ukuthi uhlelo lolu luqalise.
Kodwa inengi labazali lithi lokhu akusoze kwaphumelela emaphandleni ngoba umsakazo weZBC ungabambi endaweni ezinengi kulesisabelo njalo zivele zilutshwane izakhamizi ezilemsakazo emakhaya. Asizweni umbooo kaNkosikazi Siphathisiwe Nkala oweSilikwe enyakatho yeGwanda.
Amazwi akhe agcizelelwe nguNkosikazi Thando Mauba oweMantanangombe eningizimu yaseGwanda, yena othi ukufunda ngemsakazo lokhu kuzadala ukuthi abafundi bemadolobheni behambe phambili kwezemfundo kulabemakhaya.
Lanxa uhulumende esithi uzathumela abafundi bemaphandleni ingwalo zokufunda ngalesisikhathi sokuvalwa kwelizwe uNkosikazi Julieth Nkiwane owenhlanganiso elwela amalungelo abesifazane, eyeWomen Development Association of Zimbabwe- iWODAZ uthi inengi labantwana emaphandleni lihlala labogogo abangasoze benelisa ukubancedisa kwezemfundo.
Unobhala jikelele wenhlanganiso yababalisi eyeZimbabwe Teachers Association-ZIMTA uMnu Tapson Nganunu Sibanda uthi sebeveze ukukhathazeka kwabo ngalelinyathelo kuhulumende.
Umsekeli kaphathintambo wezemfundo uMnu Edgar Moyo uthi abazali akumelanga bekhathazeke ngaloluhlelo ngoba uhulumende ezathatha amanyathelo afaneleyo ukuze abafundi bemaphandleni bengasaleli emuva.
Kusenjalo umsekeli kaMongameli welizwe uMnu Kembo Mohadi ongumgcinisihlalo njalo wequla ledale lephalamende elilwisana lomkhuhlane weCovid 19 useveze ukukhathazeka ngokusilela kwempahla zokuzivikela esibhedlela esikhulu seGwanda okufaka impilo yabongi engozini ngalesisikhathi kulwisana legciwane leCorona Virus.
Ngaphandle kokusilela kwalezi mpahla UMohadi uphinde wathi ukusilela kwabodokotela kanye lezimota ezithwala izigulane ama ambulance lokuswelakala kwendawo yokuhlola leligciwane kulesisibhedlela ngezinye indubo okumele zihlolisiswe.
Uthi njalo uhulumende uzimisele ukulwisana lomkhuhlane woqhuqho osubulele abantu kulumhlubulo.