Uhulumende omutsha kweleBotswana uthi uzaqinisa ukubona ukuthi imsebenzi ethile ibekelwa izizalwane zakulelozwe, kukanti abasebenza ezindlini kanye lemapulazini, inengi lingabadabuka eZimbabwe, alisoze lithole imali yeholo elibekwe nguhulumende ele minimum wage, elilingana lamakhulu amathathu amadola ($300).
Umphathintambo omutsha obona ngendaba zemsebenzi kanye lokungena lokuhlala kwabantu kweleBotswana, uMnumzana Pius Mokgware uthi bazaqhubeka ngohlelo olwatshiywa nguhulumende wakuqala olokuthi imsebenzi ethile ibesezandleni zezizalwane zakulelolizwe.
Ekhuluma kumabonakude weBotswana Television ngoLwesine, uMnu. Mokgware uthe noma nje bezavumela ukuthi abantu bokuza bengene bekhululekile elizweni, kuzabalomzila wokuthi bengasebenza kuziphi inhlangothi, ikakhulu kumsebenzi edinga ulwazi olujulileyo.
"Silemthetho eye Employment Act yona ekubeka mgecele ukuthi kulemsebenzi egcinelwe abaBotswana. Abavela phandle kwelizwe sibafunela imsebenzi ethile esingelalwazi lazo, kumbe esisilela khona ngezisebenzi."
UMnu. Mokgware wengeze wathi abasebenza imsebenzi yezindlini kanye leyemapulazini, inengi lingabe Zimbabwe, alibalwanga kunani labantu okumele lithole iholo eleminimum wage elifakwe nguhulumende omutsha.
Uhulumende uthi kumele amakampani abhadale izisebenzi ezihola imali ephansi iP4,000 ephose ilingane lamadola aweMelika angamakhulu amathathu ($300).
"Umasikhuluma ngodaba lolu sikhuluma nge formal employment. Asikhulumi ngabantu abasiphathisa ezindlini kumbe abama piece jobs."
Abanye abeZimbabwe kweleBotswana, abafana loNkosazana Simanga Dube, bathi badaniswe yikuthi bakhitshwe kuluhlu lwalabo abazahola imali ye minimum wage.
“Kuyadanisa okukhulunywe ngumphathintambo ngoba lathi kade sesithembile ukuthi mhlawumbe sizathola imali ethe xaxa ukuze siphathise imuli zethu, ngoba esiyitholayo khathesi kayeneli.”
UMnumzana Aggrey Moyo, yena oseleminyaka eminengi ehlala kweleBotswana uthi kwakusobala ukuthi abasebenza ezindlini kumbe emapulazini abasoke bethole imali yeholo elibekwe nguhulumende abasebenza kumankampani bengakatholi.
"Ukhangele ukuthi baqale ngabaqatshi abakumankampani kuqala, besekuthi emuva kulandele abasebenza ezindlini.
UMnu. Moyo uqhubeke wathi kukhangele ukuthi umongameli Duma Boko achasise kabanzi ngodaba lolu.
“Angaboni ukuthi umongameli usebuyele emuva ngohlelo lolu. Basadinga indlela abangalusebenza ngalo, kodwa sekube lokudana okuthile phezu kombiko wokuthi abasebenza ezindlini abasoke bethole imali yeminimum wage."
UMongameli Duma Boko uthi eleBotswana lizimisele ukunikeza abeZimbabwe abaselizweni ngokungekho emthethweni amaphepha okusebenza kweleBotswana. Lokhu akuhlalanga kuhle labanye kweleBotswana abathi abeZimbabwe bazabathathela imsebenzi, kukanti ommela iZimbabwe kweleBotswana, uMnumzana Henry Mukonoweshuro, yena ulamukele lelinyathelo.
UMnu. Mukonoweshuro utshele intathelizindaba ukuthi usekhangelele ukuhlangana lomphathintambo uMnu. Mokgware ukuthi bahlaziye kabanzi ukuthi uhlelo lolu, lungasebenza njani kulandelwa okwenzakala kweleSouth Africa lapho abeZimbabwe abanikezwa khona ama special permits.
Forum