Uhulumende kumele agebhe amadamu amakhulu okulima ngokuthelezela ukuze kwenqatshelwe indlala ezaqhubeka ihlasela eminyakeni elandelayo ngenxa yokuguquka komkhathi, sokuxwayise ingcwethi kwezokulima.
Inkuthazo le iza ngesikhathi indlala isidla ubhedu eZimbabwe futhi kulabantu abaphakathi kwezigidi phose ezintathu, 2.7 million kusiya kuzigidi ezintathu ezilengxenye, 3.5 milion abalambayo abadinga usidlo lokudla okuphuthumayo.
Uphenyo olwenziwe nguhulumende luveza ukuba kusivuno salonyaka, eleZimbabwe lizathola ama-tonne aphezu kancane kwazinkulungwane ezingamakhulu ayisitshiyangalombili, 868,000 tonnes okudla.
Kodwa ilizwe lidinga ama-tonne angena kuzigidi ezimbili, 2.2 million metric tonnes ngomnyaka awokudla kwabantu lezifuyo. Ngenxa yendlala le izifuyo zikhangelelwe ukufa ngobunengi lonyaka.
Ingcwethi kwezokulima uDr Freedom Mazwi, osebenza lenhlanganiso yeSam Moyo African Institute of Agrarian Studies njalo efundisa eUniversity of Cape Town kweleSouth Africa utshele iStudio 7 ukuthi indlala yalonyaka kubele ibe yisifundo esikhulu kuhulumende.
Indlala ibhahile njalo emazweni amanengi asezansi yeAfrica lapho ihofisi yeUnited Nations ebona ngenhlelo zokuhlenga abalambayo eyeOffice for the Coordination of Humanitarian Affairs (OCHA) ethi kulabantu abayizigidi phoze ezingamatshumi amabili, 18 million, abadinga usizo lokudla oluphuthumayo.
Forum