UMongameli Robert Mugabe uthi uhulumende kalamali yokwengezelela izisebenzi zakhe iholo, zona eziphakathi kokukhalala umsebenzi.
Amazwi la uwethule eHarare ngoLwesihlanu ekhuluma ekusungulweni komhlangano phakathi kwezisebenzi, uhulumende labaqhatshi owe Tripatite Negotiating Forum-TNF.
UMugabe uthembise ukuthi uhulumende engayithola imali, uzakwengezelela izisebenzi zakhe iholo ngesilinganiso esiphezulu.
Ucele njalo amazwe angentshonalanga ukuthi esule izijeziso esithi yizo ezenqabela imizamo kahulumende yokuvuselela umnotho.
Izisebenzi zona zithi zizaqhubeka zikhalala umsebenzi andubana zengezelelwe iholo zisithi uhulumende kasebenzise inzuzo ayithola ekwenjiweni kwamatshe edayimana, eChiadzwa.
Umgcinisihlalo weProgressive Teachers Union of Zimbabwe koBulawayo uMnumzana Vusumuzi Mahlangu utshele uNtungamili Nkomo weStudio 7 ukuthi imali ikhona, ngalokhu bafuna uhulumende abengezelele iholo.
