Uhlelo lwe indigenization solulethe ingxabano lokufuthelana phakathi kwabalandeli benhlanganiso ye Affirmative Action Group (AAG) abaseHarare laba koBulawayo kubangwa indlela yokulwethulela uzulu.
Abazi ngokwenzakalayo bathi abalandeli benhlanganiso le abako Bulawayo batshaya phansi ngenduku besithi abafuni ukuthatha izinqumo ezithethwe ngabanye babo abaseHarare abafuna ukuthi kuqaliswe ngesiphangiphangi ukudinga amankampani abamhlophe okumele abelane labantu makhaza amashares.
UMnu. Matson Hlalo owayengumqondisi wenhlanganiso le utshele uGibbs Dube we Studio 7 ukuthi uhlelo lwe indigenization solungenelwe ngamakhanka.
Kusenjalo, uMnu. Thandeko Zinti Mnkandla omele iGwanda edale lephalamende njalo ekukomidi yokuhlolisisa imthetho kulelidale, uthi njengoba umthetho we indigenization ungethulwanga ngokusemthethweni ikomidi leyi isiwuhlaziya isenzela ukuthi wamukelwe ngabantu bonke.
