Izakhamizi zeHarare ziveza imibono ehlukeneyo phezu kwenyathelo likamanisipala weHarare lokubeka ama meter okubhadalela amanzi engakasetshenziswa ama-pre-paid water smart meters. Umanisipala uthi kuzaqalwa ngenkulungwane ezimbili azibekwa endaweni eziphakathi kwedolobho lezibucwadlana ezama Avenues.
Lokhu kuvezwe ngunobhala omkhulu kamanisipala weHarare uTown Clerk, uDr Tendai Mahachi elandisela intathelizindaba ukuba solukusibanga siphi loluhlelo lwama pre-paid meters.
UMahatshi uthi kuzaqalwa ngendawo ezibethiweyo ngenjongo yokuba kubonakale ukuba asebenza njani anduba abekelwe uzulu wonke kuleli dolobho.
Wathi uzulu kumele alijabulele lelinyathelo likamanisipala ngoba kunguye ozancedakala, esezawathola sikhathi sonke amanzi inqe ethengile njangalokho osekusenzakala kwezamandla kagetsi njalo kuzamfundisa ukuba awalondoloze.
Okuyinto esekelwe ngumnumzana Thabani Mhlanga wasemzini weAvondale, othi liyemukeleka lelinyathelo likamanisipala, ethemba ukuba lizaphathisa ekuthini atholakale sikhathi sonke amanzi, kungekho abawaswelayo.
Wengeza u Dube ethi ulethemba njalo lokuba lindlela izaphathisa ekutholiseni umanisipala imali ahlezi ekhala ngayo, yokuthenga imithi yokuhlambulula amanzi, kungasoze kwazwakala indaba zokungathembeki ekulondolozweni kwayo njengalokho okuhlezi kusenzakala.
Kodwa umnumzana Sibusiso Hove waseMabvuku uthi akavumelani lombono wokubekwa kwala mameter, ekhala ngokuthi kunje abasawazi amanzi aphuma empompini.
Umanisipala uveze njalo ukuba ngemva kokubona ukuba asebenza kanjani, basuthiseka ngawabazawabeka kuhlelo lwakuqala, luzakuqheliswa ke, abekwe emizini yonke yaleli dolobho.
Baveze njalo ukuba imihlobo ebekelwa uzulu emizini lapho ahlala khona yehlukile kulaleyo ezakubekelwa abamankampani lamabhizimusi.