Oxotshwe kubandla leZanu PF nyakenye uMnu Rugare Gumbo uthi abacuphi bohlangothi lweCIO batshona bemlandelela ukuze babone konke akwenzayo.
Kungxoxo ayenze leStudio 7 ngoMvulo uGumbo uchaze uMongameli Robert Mugabe njengontando kayiphikiswa.
UMnu Gumbo wethule amazwi la ngemva kokuchothozwa nguMugabe ngempelaviki esithi uGumbo ngumhlamuki ongabongiyo.
UGumbo uxotshwe kubandla leZanu PF labanye abagoqela uNkosikazi Joice Mujuru besetheswa umlandu wokuzama ukugenqula umbuso kaMugabe.
Bonke bayalilandula lelicala.
Ekhuluma lomsakazo weZBC ngempelaviki, uMugabe uthe nguye owalwela uGumbo ukuthi avunyelwe njalo ukuba lilunga leZanu F ngemva kokuxotshwa kulelibandla eminyakeni edluleyo.
Kulokuthi abonge, uMugabe uthi uyamangala ukuthi uGumbo usephatheka emizameni yokugenqula umbuso wakhe.
Kodwa uGumbo uthi uMugabe usenga ezimithiyo. Uthi umuntu owamlwelayo ukuthi avunyelwe njalo ukuba lilunga leZanu PF nguMzenda, hatshi uMugabe.
