UGideon Masiku, owadlalela iqembu leRailstars endawonye labafowabo uMaster loMtewa uthi bekungekho lula ukulandela enyaweni zabo.
“Ngo1998 ngaqala ukudlala kuqembu labasakhulayo eleRailstars siqeqetshwa ngumdala uAli ngaze ngathuthukiswa lami ngayadlala kuqembu labakhulu. Ngasiselwa iqembu leZimbabwe Saints ngoba umuntu owayedlala endaweni yami kwakunguJohn Shambarume owayengumdlali wezinga laphezulu. Ngadlala kuSaints okomnyaka owodwa ngasengiphenduka ngazodlala kuRailstars okweminyaka emine njalo ngasengiyingxenye yeqembu eladliwa liqembu leBosso lacina seligunyulwe sayadlala kuDivision One kodwa senelisa ukuphenduka ngemva komnyaka owodwa,” kutsho uMasiku.
UGideon uthi abafowabo bebemkhuthaza kakhulu ngesikhathi edlala labo njalo bebengathikazi ukumtshela nxa engadlali kuhle njengosuku lapho ayehluleka khona ukumaka umgadli weqembu leCaps United uBrian Badza.
“UMarco Polo (Brian Badza) bamupha ibhola ngabe ngisiyamaka, wabe eqhuba ibhola waze wafika ekhoneni, ngemva kwalokho ugijime waze wayafika ebhokisini lapho engaze ngamkhabela khona. Ngithe ngifika endlini obhudi bami bangitshingela kakhulu ukuthi kambe bengingaphelekezela umuntu esuka phakathi laphakathi kwenkundla ngize ngiyemkhabela ebhokisini njani. Lami laphana ngabona ukuthi ngaphosa ngayangisa,” kutsho uMasiku.
UMasiku uqhubekele phambili wathi kuqakathekile ukuba abasakhulayo beziphathe ukuze benelise ukudlala ibhola baze baphumelele.
“Abafana ngithi kibo ukudlala ibhola kufuna ukuzibamba lokwazi okufunayo. Kumele belalele abakutshelwa ngabaqeqetshi njalo betshiyane lezidakamizwa ngoba bengaqala ukubhema okudakayo abangeke beyale belokhu besebholeni,” kutsho uMasiku.
Ngaphandle kokudlalela iqembu leRailstars uMasiku udlalele leqembu leDynamos kanye leleBata Bullets elaseMalawi.
Ekutshiyeni kwakhe ukudlala ibhola uqale ukuqeqetsha abadlali abasakhulayo njalo uyingxenye yabaqeqetshi beqembu eliphakamise isicoco kusigaba seBulawayo Province Division 2 eleZebra Revolution ndawonye lomfowabo uMtewa kanye lomnikazi weqembu uMkhokheli Dube.
Forum