Udlakela oluphathelane lezombusazwe lwehlile ngenyanga edluleyo nxa luqathaniswa lenyanga kaNhlangula, kubika inhlanganiso ekhankasela ukuthula elizweni, iZimbabwe Peace Project.
Embikweni ewethule ngoLwesibili inhlanganiso le ithe izehlakalo zodlakela kanye lokwephulwa kwamalungelo oluntu kwezombusazwe kwehlile kusuka kunkulungwane ngoNhlangula kwaya ku makhulu ayithobamunwe munye ngoNtulikazi.
Kodwa inhlanganiso le ithe ukufuthelana kusezingeni elibi ikakhulu eMidlands, Manicaland, Mashonaland Central, Mashonaland Aast kanye leMasvingo.
Izigaba ezithi iMatabeleland North, leSouth kanye leBulawayo zilezehlakalo zodlakela eziphansi kakhulu. Ibandla leZanu PF yilo elihlezi lisetheswa umlandu wokubangela loludlakela.
Kunsukwana ezedluleyo uMongameli Robert Mugabe usole kakhulu udlakela wakhuthaza abasekeli bamabandla atshiyeneyo ukuba bahlalisane ngokuthula.
Umkhokheli weZanu PF edale lephalamende uMnu Joram Gumbo uthe ukwehla kodlakela yinto enhle.
Amazwi kaGumbo agcizelelwe ngumsekeli wesikhulumeli seMDC ekhokhelwa nguMnu Morgan Tsvangirai uNkosazana Thabitha Khumalo.
