Inhlanganiso ezisebenzelana labesifazana sezikhuthazwe ukuthi zikhulumisane lozulu lohulumende ngembadalo kwezempilakahle ilizwe eliyibhadalayo minyaka yonke ngenxa yokungahlalisani kuhle ezindlini kanye lodlakela kwabesifazana lapho kunanzwa ilanga labesifazana – iWomen’s International Day.
Imali ehlelwa lapho kusenziwa uluhlu lokusetshenziswa kwemali, i-Budget enikwa ugatsha lwezempilakahle ibhekana lomlandu wokunakekela inengi labesifazana abayabe bedlwanguliwe, labo abayabe bezithwele ngenxa yalesisehlakalo, abalimala ngenxa yokutshaywa kanye lalabo abazithola bengasaphili kuhle engqondweni ngenxa yodlakela.
Ugatsha lwezempilakahle luvele luphethe inqgamu ngasebukhalini bayo ngenxa yokukhonona kwezisebenzi ngenxa yeholo elincane osokwenze kwabanzima ukuthi abagulayo bathole uncedo olwaneleyo.
Olunye njalo uhlupho olubhekana lelizwe ngenxa yodlakela yisikhathi sokusebenza esilahleka ngenxa yabantu abaqeda isikhathi belimele kumbe benakekela labo abayabe belinyazwe kudlakela lwezindlini.
Phezu kwakho konke lokhu, udlakela ezindlini, ikakhulu kwabesifazana soluvezwe njengesinye isizatho esenza abesifazana ikakhulu abendileyo, baqhubeke bethelelwa igcikwane lengculaza.
UNkosikazi Marjory Jamela, osebenza labesifazana uthi kujwayelekile ukuthi nxa kukhulunywa ngodlakela kucatshangwe ukuthi ludaba lwabomama, kodwa ilizwe lihlezi libhadalela udubo lolu kundleko zempilakahle. Ethi isilinganis semali esetshenziswa ekuqedeni umkhuhlane wengculaza singehla nxa kungaqedwa udlakela kwabesifazana ngoba lokhu kuhamba ndawonye.
UNkosikazi Tsepiso Nkomo, ongumongikazi, uthi inengi imali esebenza ekwelapheni abesifazana abaza beqamukile, begula emzimbeni lasengqondweni ngenxa yodlakela.
Imali le, uthi igoqela njalo esebenza kumantombazana azithwalayo acine ekhupha izisu okungekho emthethweni ngemva kokudlwangulwa aze ezibhedlela sokusele udokoza nje okudinga imali enengi ukuthi elatshwe.
UMnumzana Japhet Mloyi, oyisakhamuzi, uthi nxa kuqhubeka kukhulunywa ngodaba lodlakela ezindlini njengodubo lwabomama kuzabanzima ukuthi kuthathwe amanyathelo akhanyayo ukulwisana lalimvukuzane kodwa kudingeka ukuthi uhulumende akhangele udlakela njengodaba olulendleko ezinengi kakhulu ezikhama uhulumende ovele engelamali. Kungakho ethi kuqakathekile ukuthi abesifazana banikwe amathuba azabancedisa ukuthi bazimele bathathe izinqumo ngempilo zabo.
Esinye njalo isakhamuzi, uMnumzana Sipho Ngwenya, uthi ezikhathini ezinengi ukusetshenziswa kwemikhuba kanye lamasiko akudala kuthwalisa nzima abesifazana. Uqhubeke esithi inengi labesifazana elizithola libhekane lodlakela ngeliswelayo okutsho ukuthi lalapho selisiya ezibhedlela kuba ngumthwalo kahulumende.
Ilanga leInternational Women’s Day, linanzwa ngoLwesibili mhlaka 8 Mbimbitho, emhlabeni jikelele phansi kwendikimba ethi “Pledge for Parity”, okuyinkuthazo emuntwini wonke ukuthi azimisele ukuba yingxenye yokulwela ukulinganiswa kwamathuba abesifazana kunhlangothi zonke zokukhokhela kanye lokuhlonipha imibono yabo.
Abezempilakahle bahlezi bekhuthaza ukuthi ukuphathiswa kwabesifazana ukuthatha izinqumo ngempilakahle yabo kanye lemuli zabo kulakho ukwehlisa inani labantu elizithola ezibhedlela lidinga uncedo.
