UAnthony Nakamba, uyise womdlali wenguqu odlalela iqembu leAston Villa elaseNgilandi uMarvelous, uthi indodana yakhe idabuke kakhulu ngokungenelisi ukuzodlalela iqembu elimela isizwe elama Warriors emidlalweni yokudinga amaqembu azakuyadlala kumncintiswano we Africa Cup of Nations.
UNakamba omdala uthi indodana yakhe ivele kayithandabuzi ukudlalela iqembu lesizwe kodwa noma yena uMarvelous ubefuna ukuzodlala, iqembu lakhe ele Aston Villa lithethe isinqumo esingaphezu kwamandla akhe.
“Kusuke kwaba nzima kakhulu. Yena uMarve ubefuna ukubuya ezodlalela iqembu lesizwe kodwa iqembu lakhe lithe ngenxa yemigoqo esifakwe yinkokheli ye United Kingdom selingalaluka lingasayenelisi ukumsebenzisa kuze kuphele isizini. Ubezathi esebuyela bamvalele okwensuku ezilitshumi aphinde njalo adinge isikhathi sokuzilolonga aze afane labanye abadlali.
Kube buhlungu ngoba yena ubefuna ukuzodlala kodwa kube nzima ukuba iqembu lakhe limkhulule okuyinto ebuhlungu kodwa laye uze watsho ukuba iqembu lakhe likubone kusobala ukuba azihlalele ngenxa yemigoqo leyi efakiweyo,” kutsho uNakamba.
Ilizwe le Zimbabwe lifakwe kuluhlu lwamazwe alengozi enkulu eyokuthola umkhuhlane we Covid – 19 ngele United Kingdom.
Lokhu kutsho ukuba inengi labadlali beqembu lama Warriors abadlalela amaqembu ase United Kingdom kabasoze bavunyelwe ukubuya kwele Zimbabwe ukuzokuba yingxenye yamalungiselelo alo awokuphatheka kumkhankaso wokudinga amaqembu azadlala kumncintiswano we Africa Cup of Nations.
Abazabuya kwele Zimbabwe bazabe bezavalelwa emahoteleni okwensuku ezilitshumi kuyindlela yokuvikela ukuba bengasabalalisi umkhuhlane nxa bengabe belawo.
Iqembu le Zimbabwe lizavakatshela ele Botswana mhla zingamatshumi amabili lambili kunyanga kaMbimbitho, kuthi ngemva kwensuku ezinhlanu liyamukele ele Zambia.
IZimbabwe, iBotswana le Zambia zilwisa ukuba ngelinye iqembu eliphuma kusibaya sika Group H elizakuyadlala kumidlalo ye Afcon ezaqhutshelwa elizweni lase Cameroon ngo2022.
Iqembu elihlezi phezu kwengalane yesibaya sika Group H ele Algeria lalo lilabadlali abavinjwe ngumthetho ovalele uNakamba ukuba azodlalela ama Warriors ababalisa uRiyadh Mahrez oweqembu le Manchester City.
Ele Algeria lona kodwa ngelinye lamaqembu avele asephumelele ukuyadlala kwele Cameroon okokuthi ukungabi khona kwabadlali balo abadlala eNgilandi akusoze kubakhalise kangako.