Kuqhamuke ukufuthelana okukhulu phakathi kwamalunga edale lephalamende awebandla leMDC laweZanu PF ngolweSithathu aphosa atshayana ephikisana ngodaba lwezijeziso ezethulelwa iziphathamandla zeZanu PF ngamazwe afana leMelika lawomanyano weEuropean Union.
Ukukhulumisana kubi lokhu kuqale lapho uMnumzana Kudakwashe Bhasikiti olilunga leZanu PF azise khona ukuthi ufuna idale lephalamende licele abakhokheli bamacele womabili eMDC, uMnumzana Morgan Tsvangirai loMnumzana Arthur Mutambara bakhankasele ukwesulwa kwezijeziso beqinile.
Esizwa lokhu amalunga eMDC aqalise ukuhoza, ukufuthelana kwalumatha abeZanu PF labo badla amalahle. Lokhu kubangele ukuthi umsekeli kamlawuli wedale uNkosazana Nomalanga Khumalo achithe idale.
NgoLwesibili inhlanganiso yomanyano wamazwe awezwekazi leAfrica oweAfrican Union ukhuthaze ukwesulwa kwezijeziso.
Umsekeli wesikhulumeli seMDC ekhokhelwa nguMnumzana Tsvangirai, uNkosazana Thabitha Khumalo usole kakhulu amalunga eZanu PF ngesicelo sawo phezu kodaba lwezijezio esithi injongo yawo ngeyokuthi uTsvangirai axotshwe umsebenzi.
Kodwa amazwi la alandulwe nguMnu Joram Gumbo ongumkhokheli weZanu PF edale lephalamende yena othi ibandla lakhe alilanjongo yokuxotshisa uMnu Tsvangirai umsebenzi, esithi elikufunayo yikuthi iMDC ikhankasele ukwesulwa kwezijeziso iqinile.
