Izakhamizi zakoBulawayo ziveza imibono ehlukeneyo ngokwethulwa komthetho iStatutory lnstrument 77 of 2020 Public Health.
Lumthetho wethulwa ngenjongo yokubona ngokumiswa kwemicimbi ebuthanisa abantu abanengi lemihlangano egoqela ezinkonzweni elizweni lonke jikelele emizameni yokwenqabela ukumemetheka kweCoronavirus osuthethe imipefumulo yabantu abanengi emhlabeni jikelele.
Isakhamuzi sakoBulawayo, uMnu Isaac Moyo uchaze ukuba umthetho osuphawulwe nguhulumende unzima ebantwini.
''Umthetho lo unzima ebantwini, ivalela abantu endlini inyanga iphela kufunakala imali yerent lokudla, uma ngivalelwe endlini akucaci ngoba uhulumende uthi ngingephula imithetho uzangibopha kodwa yena katsho ukuthi uzangisiza njani ngesikhathi ngiphila ngaphansi kwale imithetho.''
UMnu Ian Rush Moyo esinye njalo isakhamuzi sakoBulawayo, uthi ukubopha abantu kuzabanzima kufana lokubabulala.
''Umthetho lo abawufakileyo unzima ufana lokuthi babulala abantu, sinje sivuke sesibona ngamaphepha asiwazi lumthetho ukuthi uzasibopha kutheni. Ukubotshwa okomnyaka kubi kungani bengaxwayisi abantu kungela kuhambisana ejele, lemithetho yakhona asikayitshelwa asila lwazi.''
UMnu Austin Ncube yena usola umphathintambo wezempilakahle ethi uyehlulekile ukwenqabela lumkhuhlane kanye lokusabalalisa ulwazi lokuthi uzulu azivikele njani.
''Umthetho osuthe wabekwa lo ungenza ngisole umphathintambo wezempilo ngoba uyehlulekile ukuvimbela ukumemetheka kwalo umkhuhlane, abantu abalungiselelanga kunje umuntu engagula kazi ukuthi ayephi. Izibhedlela zifuna amakhulu amathathu asilayo leyomali. Singahlala ezindlini sizalamba, uZesa ufuna imali yakhe lokhansili thina abanye singaaloja kunzima umama lobaba basekhaya bakhangelele kimi abazi lutho ngecorona layonale imithetho.''
lsizalwane seZimbabwe esihlala eSouth Africa, uMnu Ngqabutho Mabhena ukhuthaza izizalwane zeZimbabwe ukuba loba zikuphi komhlaba kumele zilandele umthetho.
''Kuyasethusa kakhulu ukuthi igcikwane lecorona lokhe limemetheka eSA, ngikhuthaza izizalwane zeZimbabwe lilandele imithetho yakuleli lekhaya ukuze igcikwane leli lingamemetheki.''
Ngeviki edluleyo uMongameli Emmerson Mnangagwa wethule iziqondiso ezithile emizameni yokuvimba ukusabalala lokuthelelanwa kwegcikwane leCOVID19 ezigoqela ukumiswa kombukiso wezokuthengiselana oweZITF, imbuthano yokuthakazelela uzibuse lokunye.
Usephinde wamisa lemihlangano elabantu abedlula amatshumi amahlanu, imidlalo ehlukeneyo, ukungena lokuphuma ezweni kwabantu, okukhangelelwe ukuthatha amaviki amathathu abantu behleli emakhaya ngaphandle umuntu esenza izinto eziqakathekileyo, ezifana lokuthenga amaphilisi, ukudla lokuyadinga impilo.
Abantu abasavunyelwa ukuhambahamba mahlayana, abathwala abantu bazakwaziswa ngeziqondiso okumele bazilandele njalo izizalwane zeZimbabwe eziyabe ziphindela ekhaya zivvela kwamanye amazwe zizahlolwa ukuba azila lumkhuhlane na.
Ozafumanwa eseqa limithetho, umuntu uzabotshwa agweetshelwe ukuhlala ejele okomnyaka wonke.