Abekhansili yedolobho lakoBulawayo babika ukuba babhekane lodubo olukhulu lwezinja ezinengi ezizulazulayo zingelabanikazi ezithaladeni kanye lokuqonga kwenani labantu abalunywa yizinja lezi okwesatshelwa ukuba kungasababalisa umkhuhlane wobhova owerabies nejngoba lezi zinja zingahlatshwa amajekiseni wokuvikela imikhuhlane.
Umsekeli kamqondisi wezempilakahle lokuhlanzeka koBulawayo, uMnu Charles Malaba uchasisa kabanzi ngomkhuhlane wobhova.
''Umkhuhlane wobhova ubangelwa ligcikwane uvame ukusuka kunyamazana usiya kweyinye kumbe emuntwini lapho ithe yaluma ilalo mkhuhlane. Ubhova lubonakala ngokuthi inyamazana leyo iyabe isigxoza indenda isesaba amanzi ingadli. Umuntu olobhova ukhala njengenyamazana eyabe imlumile njalo engaselathando lokudla.''
Umkhuhlane wobhova uyelapheka kodwa abezempilakahle bakhuthaza ukuba wenqatshelwe ungakabambi inyamazana. Umuntu engalunywa yinyamazana elobhova kumele athole amajekiseni amathathu avikela ukubamba ubhova. UMalaba uqhubeke echasisa ngalokho.
''Kulomuthi oyelapha ubhova kodwa kuqakathekile ukuba uyenqatshelwe ungakabikhona kodwa uma isikhona ayisayelapheki inatshengiselakuqakathekile ukuba ivikelwe. Umuntu engathola ukwelatshwa esanda kulunywa yinyamazana elobhova uyahlatshwa amajekiseni amathathu iAnti Rabies Vaccines. Uyahlatshwa ngelanga lakuqala, ayetshwa njalo ngemva kwamalana ayisikhombisa aphinde njalo nemva kwamalana ayisikhimbisa kodwa kayelapheki umuntu ubhova enaqala ukubonisa izibonakaliso zobhova, kunjalo lakunyamazana kumele ihlale ivikelwe kulo umkhuhlane kodwa ingaqala ukubonakalisa izibonakaliso zokuphathwa lubhova iyabe inasayelapheki sekulindwe ukuba ife, kunjalo lakumuntu ubonisa izibonakaliso zobhova kayelpaheki.''
UBulawayo kakabi lalo udubo lomkhuhlane wobhova kodwa banengi abantu abalunywa yizinja ikakhulu ezintula ezithaladeni ezingelabanini. UMalaba ukhuthaza abantu ukuba bagcine kahle izinja zabo ukuze zingathelelwa ubhova yilezi ezigcwele phandle zingelabanini.
''KoBulawayo ngeke nathi udubo lobhova lukhona esilakho yisilinganiso esiphezulu sabantu abalunywa yizinja ezintulayo esikukhuthaza abantu yikuba bangalunywa baijime bayehlatshwa ijekiseni engike zokuvikela ubhova. Udubo lwezinja ezintulayo zinengi kabi edolobheni njalo kulabo abehluleka ukuvalela kumbe ukubophelaizinja zabo zilakho ukuthathela umkhuhlane wobhova kulezo ezintulayo ezingabe zilomkhuhlane wobhova nakho kuqakathekile ukuba uBulawayo avikele izinja zakhe ekubambeni umkhuhlane wobhova ngokuzihlabisa ijekiseni yokuzivikela kanye lokuzihlalisa endaweni ezingeke ziyolunywa kumbe ukuhlanana lezilobhova.''
UKhansila waWard 1, uMlandu Ncube uthi njengekhansili sebanquma imilayo ethile njalo inja ehamba mahlayana iyadutshulwa.
''NjengoBulawayo sanquma ukuthi lowo muntu olenja edolobheni uma ehamba layo kumele abe eyibophile ahambe eyibambile. Amayadi amanengi elokitshini avunyelwa inja eyodwa, ayivunyelwa ukuba phandle kweyadi silohlelo olubizwa ngokuthi bophelainja yakho. Senza njalo esinye isinqumo sokuba inja ebonakala intula iyadutshulwa ife noba ziyawona emayadini abanye, ziyaluma abantu njalo kunzima ukuyilandelela ubona ukuba yavikelwa kumkhuhlane wobhova.''
Isakhamuzi sakoBulawayo, uMnu Ndodana Moyo uthi kuqakathekile ukuhlabisa izinja zivikelwa kumkhuhlane wobhova.
''Ukuhlabisa izinja kuqakathekile kakhulu kumele zivikelwe kumkhuhlane wobhova ngoba inaluma umuntu ingavikelwanga kumkhuhlane wobhova iyathelela umuntu ubhova. Inengi lezinja ziyntula phandle lapha noba abanini bazo abesenelisi ukuzisilela ngoba umumo osezweni awumanga kahle izinja ezinengi ziyalamba yikho sezibaleka emakhaya azo zintula ledolobho zidinga ukudla.''
Ubhova lulakho ukutholakala kunyamazana zonke njalo umuntu ubalobhova engalunywa yinyamazana elobhova. Inyamazana ezinengi ziyavikelwa kulo umkhuhlane ngokuhlatshwa amajekiseni. Okwamanje idolobho lakoBulawayo libhekane lodubo lwezinja ezizulazulayo zingelabanini njalo lezilabanini azinakekelwa.
