Abogatsha lwezempilakahle koBulawayo sebemanyene labohlangothi lukamanisiphala olweBulawayo City Council Health Department, ekusunguleni uhlelo lokuhamba behlaba izisebenzi eziqakathekileyo lapho ezisebenzela khona. Uhlelo lolu olweMobile Covid 19 Vaccination Program, luqalele emtholampilo, eNorthend Clinic.
Lolu hlelo lukhangelelwe ukuqhutshwa phakathi kwensuku eziyisifica minwe mibili kuthi ukuhlatshwa kwesibili kwaleli jekiseni kulandele ngemva kwensuku eziphose zifike inyanga-28 Days.
Esungula okusemthethweni uhlelo lokuhamba behlaba izisebenzi zezempilakahle, olweMobile Vaccination Program, uMqondisi wezempilakahle kukhansili yakoBulawayo, uDokotela Edwin Sibanda yena ohlatshwe ngoLwesithathu uthi abahlaba leli jekiseni bahamba belanda izisebenzi zempilakahle lapho ezikhona.
“Silamaqembu amane, elinye liseMpilo elinye liseUBH, kuthi amanye amabili azabhoda ledolobho ehamba ehlaba zonke izisebenzi zezempilakahle, ezisebenzela uhulumende, ezisebenzela amankampani azimeleyo, amakiliniki wonke ekhansili, Surgery, Mater Dei, Royal Womens Clinics lazo zonke ezempilakahle ezisedolobheni behlatshwa belapho abasebenzela khona. ”
Intathelizindaba yakoBulawayo uMkhululi Ncube ohlatshwe lamhlanje uthi ukubone kuqakathekile ukuzivikela.
“Kuqakathekile ukungena kuloluhlelo ngoba lapho sisebenza sihlangana Labantu abahlukile abanengi ngakho kuqakathekile ukuthi sizivikele kulo umkhuhlane njalo yithi esiloba ngawo lumkhuhlane kakhulu kuzasisiza singangena kuloluhlelo ukuze lapho kungaba Labantu abaphathwa kubi ngaloluhlelo kuzakuba lula ngoba sidlule kikho.”
UNkosikazi Sitshengisiwe Siziba okumsebenzi wokubona ngezokuhlanzeka koBulawayo uthi uhlatshwe ngoMvulo.
“Ngithanda ukukhuthaza abantu ukuba bahlabe njalo bekulemibiko engamihlanga ngejekiseni leli, kodwa mina ngihlabe NgoMvulo. Kuqakathekile njalo ukuba ngemva kokuhlatshwa uqhubeke ulandela iziqondiso zeCovid-19 lockdown ukuze loba ingakuhlasela njalo iCovid-19 ingakukhuleli.”
UBulawayo uqale uhlelo lokuhlaba izisebenzi zempilakhle ngoMvulo, njalo ukhangelele ukuhlaba izisebenzi eziqakathekileyo ezedlula inkulungwane eziyisithupha lengxenye 6 600 kuhlelo lwakuqala lokuhlaba abantu ijekiseni leSinopharm Vaccine. Lokhu kwenzakala ngemva kokuba leli dolobho lithole amajekiseni edlula inkulungwane ezilitshumi lantathu-13 200, azasebenza kuhlandla lakuqala lweSinopharm Covid-19 Vaccination Program.
