Inhlanganiso eziphikisa ukuthi uhulumende akhokhele uhlelo lokulotshwa kwesisekelo sombuso esitsha ezibalisa iNCA, iZCTU leZINASU zithi zilokhu zisebenzelana leMDC lanxa ziyisola ngokuphatheka kuhlelo lolu.
Umgcinisihlalo weNCA uMnu Lovemore Madhuku, uMongameli weZCTU uMnu Lovemore Matombo loMongameli weZINASU uClever Bere batshele intathelizindaba eHarare ngolweSine ukuthi ukungezwani okukhona phakathi kwenhlanganiso zabo leMDC kusedabeni lokulotshwa kwesisekelo sombuso kuphela kodwa bayavumelana entweni ezinengi.
Abathathu laba kanye labanengi abasola indlela uhulumende aqhuba ngayo lolu hlelo bathi ingxaki ezikhona ziveza ukuthi uhulumende kenelisi ukulukhokhela uhlelo lolu.
Kuqhamuke ingxabano phakathi kweUnited Nations Development Program lekomidi yedale le phalamende ekhokhela uhlelo lolu ngeviki edluleyo phezu kwesikwelede esifika phose isigidi esisodwa esitshiywe ngabantu abakade befundiswa ukuthapha imbono yazulu yikomidi yedale lephalamende le.
I UNDP yalile ukusihlawula isikwelede lesi ngoba isithi siphezulu kakhulu, kodwa kube lokukhulumisana phakathi kwayo lohulumende ngolweSithathu kwavunyelwana ukuthi iUNDP izasihlawula.
Ukuhlaziya ingxaki ezikhona kuhlelo lolu, uNtungamili Nkomo uxhume omunye wabagcinisihlalo bekomidi yephalamende ekhokhela uhlelo lolu uMnu Edward Mkhosi lengcwethi ecubungula ezombusazwe uMnu Themba Dlodlo.
