UMongameli Joe Biden wakwele Melika uthi “wenza iphutha” kungxoxo mpikiswano loMnu. Donald Trump ngeviki edluleyo kodwa uzaqhubeka ngokuncintisa kukhetho.
Intathelizindaba yeVOA uScott Stearns ukhangela umumo womkhankaso wokhetho lukamongameli ngalesi isikhathi izizalwane zeMelika zinanza usuku lukazibuse.
Umhlaka 4 Ntulikazi ngeminyaka yokhetho lukamongameli wejayele ukuba lusuku lokukhankasa abantu beveza ukuzinikela elizweni labo ngokuthwala uphawu lwesizwe. Kodwa lonyaka, abancintisa kulolukhetho abazange bakhankase kulandela ingxoxo-mpikiswano yabo ngeviki edluleyo, umongameli Joe Biden ezama ukutshengisa abasekeli bakhe ukuthi usalawo amandla njalo uDonald Trump engenzanga lutho olungenza abantu beme ukugxila ebunzimeni obahlangane laphikisana laye kungxoxo-mpikiswano.
Ekhuluma lomsakazo weWisconsin radio station WAUK, uBiden uthe kaqhubanga kuhle kungxoxo-mpikiswano yangolwesine olwedluleyo.
"Ngaba lobusuku obunzima. Ngaba lobusuku obunzima. Iqiniso ngelokuthi ngenza iphutha. Kodwa ngafunda kubaba, owayesithi ungawa kumele uvuke.”
Umkhankaso kaBiden uzama ukuphathisa ozamela ibandla lamaDemocrats ukuthi avuke ngemibiko yamaGovernor ebandla leDemocratic Party eveza ukuthi bama laye kugoqela oweNew York uKathy Hochul.
“Ngilapha ukuzolitshela namuhla ukuthi uMongameli Joe Biden uzanqoba, njalo sonke sizinikele ukumsekela ngoba okungalahleka kulolukhetho kunengi kakhulu.”
Abasekeli bakaTrump e-Congress bakhupha imibiko elakho ukubangela ukuthandabuza kwebandla leDemocratic Party ngo Biden. Usomlomo walelidale uMike Johnson uthi...
“Ngibona sengathi labo bayakwazi ukuthi balodubo olukhulu. Kodwa alusulo dubo lwezombusazwe kuphela kumbe olwebandla lamaDemocrats, ludubo lwelizwe lonke. Silodubo lapha ngoba silomongameli okhanyayo ukuthi akalawo amandla okukhokhela, yisikhathi esiyingozi kakhulu lesi.”
Ucwaningo oluqhutshwe ngemva kwengxoxo-mpikiswano yeCNN luveza ukuthi abasekeli bebandla lamaDemocrats labavoti abakucele lamaDemocrats abayisilinganiso sokungamatshumi amahlanu lasithupha ekhulwini -56% sebesithi bengaba lethuba elingcono elokunqoba nxa bemelwe ngomunye ongayisuye Biden.
Imikhankaso yonke iba lendubo ezitshiyeneyo, kodwa imibuzo ngempilakahle kaBiden izahlala ikhona, kutsho usikhwicamfundo Jeremi Suri oweUniversity of Texas
“Ulakho ukunqoba kulolukhetho. Iqiniso ngelokuthi, ulakho ukuba nguye othandwa ngabavoti abanengi nxa engaqhubeka ngokuncintisa kulolukhetho. Kodwa umkhankaso wakhe ubulethemba lokuthi ingxoxo-mpikiswano le izaqeda ukukhathazeka kukazulu ngempilakahle yakhe. Ukukhathazeka lokhu akusoze kuphele. Kuzaqhubekela phambili kuze kufike usuku lokhetho.”
Umkhankaso kaTrump awuzange uhlangane lozulu kuliviki, ukhuphe umbiko othi, “sizaqhubeka ngokuqinisa impumelelo kaMongameli Trump, ukubuthanisa imali esiyidingayo ukuze sinqobe, njalo singena kuhlandla elilandelayo sikhangelele ukunqoba kabanzi.”
UTrump unanze usuku lwenkululeko ngombiko awuthumele ebulenjini kuwebsite yakhe eye-Truth Social website esithi iMelika ilembali enhle kakhulu.
“Asisoze sikhohlwe ukuthi siyizizalwane zeMelika, njalo ikusasa ngelethu. Umoya wenkululeko yeMelika awusoze uphele, uzahlala ukhona kuze kube laphakade. Ngilifisela lonke usuku lwenkululeko oluhle.”
Ngalesisikhathi ibandla lamaRepublicans lilungisela umhlangano walo omkhulu owe-Convention kuyonalinyanga, uTrump ulakho ukuphathiswa yikungaqhubi kuhle kukaBiden, kutsho usikhwicamfundo Suri oweUniversity of Texas.
“UDonald Trump angafuna ukukwenza yikutshengisa ukuthi ngumuntu ozwisisayo hatshi ukuveza ukuthi usalamandla kuphela. Ukwenzela ukuthi kungabi ngumncintiswano ophakathi komkhokheli olamanga loseluphele, kodwa kubengumncintiswano phakathi koseluphele lozwisisayo.”
UBiden loTrump sebesele lamalanga alikhulu lamatshumi amabili lanhlanu ukukhankasa kukhetho lukamongameli oluzaqhutshwa ngoLwezi.
Forum