UMongameli Joe Biden wakwele Melika uthi ilizwe lakhe lizaqhubeka liphathisa eleIsrael lize linqobe ekulwisaneni elikwenzayo leqembu lebutho eleHamas.
UBiden wethule lumbiko esekwethekeleleni lumhlubulo kuhambo lapho akhangelelwe ukuya kwele Jordan nxa esuka kwele Israel. Ekwele Isreal uhlangane lenhloko kahulumende yalelo lizwe uMnu. Benjamin Netanyahu, yena othe iHamas yiyo ebangela ukubulawa kwabantu makhaza abangahlomanga eGaza Hospital ngoba isilwa icatsha ngabo.
UBiden uthe ilizwe lakhe lilungiselele ukuma lele Israel ize inqobe iHamas athi yiyo eqale ukuhlasela eleIsrael.
Ekhuluma emhlanganweni munye uNetanyahu uthe iHamas yiyo efaka abantu makhaza engozini ngoba kayilandaba lokufa kukazulu okuyikho okwenza ilwe icatsha ngabantu.
Uqhubekele phambili ethembisa ukuthi ilizwe lakhe lizakwenza konke okusemandleni alo ukuvimba ukubulawa kwabantu makhaza abangahlomanga ikakhulu abesifazana labantwana.
Uphike ukuba ilizwe lapkhe yilo elibhombe eGaza Hospital lapho okubulewe abantu abafika amakhulu amahlanu – 500. Kodwa iHamas layo iyakuphika lokhu.
Kusenjalo, batshengisela emigwaqweni abantu eLebanon bekhonona ngokubulawa kwabantu mahlayaya eGaza Strip.
Olandela ezokudlelana kwamazwe womhlaba lezombusazwe njalo owayeyintantelizindaba elodumo eZimbabwe, osesebenzela eBhilithane, UMnu. Bekithemba Mhlanga, ukhuthaza amacele womabili ukuthi alandele imithetho yempi.
Ekhuluma leStudio7, ingcwethi yezombusazwe efundisa ekolitshini le-National University of Science and Technology, uMnu. Stevenson Dlamini, uthi ukubulawa kwabantu mahlayana akwamukeleki njalo amacele omabili kumele amise lokhu.
Konke lokhu kuza kulandela ukubhonjwa kwesibhedlela se-Ahli Arab Hospital esise Gaza
Impi le eqale mhlaka 7 Mfumfu isibulalise abantu abedlula inkulungwane phose lengxenye – 1,400 abe-Israel, labanye abedlula inkulungwane ezintathu – 3,000 eGaza.
Abanye abedlula inkulungwane ezilitshumi lambili – 12,500 balimala.
Forum