UMongameli Joseph Biden ukhangelelwe ukuba uzakwethekelela kwele Israel kusasa njalo lakwele Jordan lapho azaxoxisana khona lenkokheli yamazwe la ngempi ephakathi kwele Israel leHamas esibulele abantu abafika phose inkulungwane lengxenye – 1,400 kulelolizwe.
Abezindaba abeReuters babika ukuba uhambo luka Biden lwenziwa ngesikhathi eleMelika selivumelane lele Israel ukuba kumele kuncedwe abantu abahlala eGaza Strip asebethwele nzima ngokusilela kwamanzi, ukudla lemithi ezibhedlela.
Ibutho lakwele Israel, eselilungiselela ukungena eGaza, selibhombe indawo ezinengi labulala abantu abafika phose inkulungwane ezine – 3,800.
EleIsrael lele Melika sekhuze iHeezbollah ehlome yaphelela kwele Lebanon esike yaphosela amabhomba kwele Israel isithi ayikuthakazeleli okwenziwa ngele Israel eGaza Strip.
Lokhu sekuzonise njalo eleIran elisekela iHezbollah. Okwamanje, abantu abedlula inkulungwane ezingamakhulu amathathu – 300,000 sebesukile kwezinye indawo eGaza Strip bayabuthana ezansi yalindawo kulandela okwethulwe ngele Israel elithi lizangena ngenkani eGaza lapho elifuna ukususela amanqe bonke abaku Hamas.
Ukuze sihlaziye udaba lolu, uGibbs Dube sixoxe loMfundisi Raphael Mthombeni okhonza eBrethren-In-Christ Church njalo ocubungula ezombusazwe ezimele othi uBiden uzama ukubhula umlilo ovuthayo.
UShiek Bilaal Gwenzi, owokholo lweSiMoslem, uthi eleIsrael kumele libisele umhlabathi kubanikazi ukuze impi le iphele.
Forum