Abantu abanengi bathi kababoni ukuthi uMnu. Thabo Mbeki, owayengumongameli wakwele South Africa, uzalungisa okuhluphayo eZimbabwe.
Bathi uMbeki kathembeki ngoba wanika ibandla leZanu PF amandla amanengi kuze kubunjwe uhulumende womanyano ngomnyaka ka2009.
Kodwa-ke abakubandla leZanu PF bathi uMbeki ulakho ukusungula inkulumo phakathi kwamabandla atshiyeneyo njengomlamlankunzi okuzakwenza ukuthi kubunjwe uhulumende womanyano eZimbabwe.
Isikhulumeli sikamongameli webandla leMDC, uDokotela Nkululeko Sibanda, uthi kungakenziwa inkulumo lezi, bafuna kukhulunywe ngokhetho olwenziwa nyakenye olwaqanjulwa libandla leZanu PF loMongameli Emmerson Mnangagwa.
Kwelinye icale, ibandla leZanu PF lithi kumele eleMDC livume ukuthi uMnangagwa wanqoba kukhetho kungakenziwa inkulumo zokulungisa okuhluphayo elizweni.
Ukuze sihlaziye udaba lolu, sixoxe labantu abambalwa kuhlelo Zimbabwe Today – Asixoxeni esilethulela ebulenjini bokuxhumana obeFacebook kukhasi leVOA Ndebele.
UMnu. Believe Gaule webandla leZanu PF uthi kuyancomeka okwenziwa nguMbeki lobanje kumele abantu beZimbabwe bezenzele abakufunayo kungelamlamlankunzi.
(Abafisa ukuzwa udaba lolu ngokugcweleyo lilakho ukuya ebulenjini bokuxhumana obeFacebook kukhasi leVOA Ndebele)