Umthethwandaba weSupreme Court ufumane umgcinisikhwama weMDC ekhokhelwa nguMnu Morgan Tsvangirai, uMnu Roy Bennet ngoLwesine emsulwa kucala ekade eletheswa elokuzama ukugenqula uMongameli Mugabe embusweni.
Igqwetha likaBennet uNkosikazi Beatrice Mtetwa utshele umsakazo weStudio 7 ukuthi ujabule kakhulu ngalesi sinqumo.
Umthethwandaba weHigh Court unqume nyakenye ngoNkwenkwezi ukuthi uBennet ubemsulwa kucala lokuqoqa umvukela leli kodwa uhulumende walusa emthethwandaba weSupreme Court ephikisa isinqumo seHigh Court.
Esethula isinqumo sakhe umahluli uJustice Chidyasiku uthe amathuba kahulumende okuphumelela kudaba alethesa uBennet afiphele kakhulu, wathi ngobufakazi obukhona, akuladale elingamthola elecala.
Kodwa akhona amanye amacala uBennet alokhe ebhekane lawo agoqela elokungcolisa igama likamahluli weHigh Court uMnu Chinembiri Bhunu kanye lelokweyisa umthethwandaba.
Ukuhlaziya udaba lolu sixhume ingcwethi kwezombusazwe uMnu Bhekilizwe Ndlovu yena otshele uNtungamili Nkomo weStudio 7 ukuthi bekuvele kusobala ukuthi uBennet kalacala alidalayo.
