Umuyi uArchbishop Desmond Tutu wayezondwa okumangalisayo ngowayengumongemeli wakwele Zimbabwe umuyi uRobert Mugabe kulandela akwethula emihlanganweni etshiyeneyo esithi kumele asuswe esikhundleni ngenkani ngoba wayesephula ilungelo loluntu njalo ebhidliza umnotho. Banengi abathi wayitshay’ekhaleni uTutu.
Loba eselele obungapheliyo umfundisi omkhulu uArchbishop Tutu, utshiye abantu abanengi kwele Zimbabwe bemhlonipha ngokutshela uMugabe iqiniso ngalokhu ayekwenza esabusa.
UTutu wethulela imisakazo eminengi lemihlangano yenkokheli etshiyeneyo ukuba kwakumele umhlaba wonke jikelele ujezise uMugabe.
UTutu wathi uMugabe wephula ilungelo loluntu njalo ebhidliza umnotho owawulungiswe kahle engakangeni esikhundleni sikamongameli.
Kodwa uMugabe waphendula ngenzondo emangalisayo esithi uTutu wayeyindojelana ekhuluma amanga.
Banengi abakhumbula amazwi ababili laba, ikakhulu akamfundisi awaphose ephukela endodeni, yahlaba umkhosi. UMnu. Nhlanhla Moses Ncube, okunhlanganiso yeFreedom Alliance, uthi amazwi kaTutu ethusa uMugabe.
UMnu. Joseph Tshuma, okudala leCentral Committee kubandla leZanu PF, uthi uTutu wazondisa uMugabe labanye abakubandla elibusayo kwele South Africa ngokunye ayekwethula emphakathini.
Isikhumeli sebandla leZapu, uMnu. Msongelwa Ndlovu, uthi uTutu wakhuluma iqiniso ngoMugabe.
UTshuma uthi kalale ngokuthula loba wayengazwanani labakubandla elibusayo eZimbabwe.
Kusalungiselelwa ukungcwatshwa kuka Tutu, owathola isicoco seNobel Peace Prize, njalo owayelwela ilungelo loluntu ekubandla leAnglican Church kwele South Africa.