Inkampani kahulumende weSouth Africa ebona ngokulawulwa kwemingcele iBorder Management Agency ithi amalungiselelo okuvulwa njalo kwemingcele ngeviki ezayo asekusibanga esiphezulu.
Ngokwesimemezelo esenziwa nguMongameli Cyril Ramaphosa imingcele yakwele South Africa, kugoqela loweBeitbridge osetshenziswa ngabeZimbabwe abanengi, ikhangelelwe ukuvulwa ngoMvulo.
Osaphethe isikhundla sikasikomishi wenkampani yeBorder Management Agency, UMnu. Gene Ravele, utshele ikhomithi yephalamende ebona ngendaba zasekhaya ukuthi basebenza gadalala ukuze imingcele ithi ivulwa kungaselamigoqo.
Uthe sebeqhube umhlangano leziphathamandla zomngcele eZimbabwe kumizamo yokuthi basebenzisane ukuzi kwenqatshelwe ukuminyana kwabantu emngceleni weBeitbridge.
Uthi Okwakuqala bafuna ukuthi izikhathi zokwenqatshelwa kokuhamba kwabantu emazweni omabili zifanane ukwenzela ukuthi izihambi zingathi ziphuma eZimbabwe zifice eSouth Africa sekuvaliwe.
Bafuna njalo ukuthi kubelokukhulumisana nxa kudindelwa abantu amaphasipoti ukuze kungathi kucele leZimbabwe sebedindelwe baphela kutholakale ukuthi kweleSouth Africa bagcwele bayaphuphuma.
UMnu. Ravele uthi udaba lokwenqabela ukumemetheka komkhuhlane weCOVID-19 phakathi kwamazwela womabili ngolunye abakhulume ngalo kabanzi.
“Sebesiphe isiqiniseko sokuthi bazaqinisekisa ukuthi akekho ophuma eZimbabwe esebenzisa incwadi yamanga yokuthi akalalo igciwane lecoronavirus.”
Uthi bakhulume kabanzi njalo ngokungena kwezizalwane zeZimbabwe kweleSouth Africa ngokungekho emthethweni kulandela insolo zokuthi amanye amapholisa eZimbabwe lamasotsha akwele South Africa aphiwa imali yesifumbathiso ngabafohlayo laba.
Ukuvulwa kwemingcele lokhu okukhangelelwe ngoMvulo sekwemukelwe ngezandla zombili yizizalwane zeZimbabwe.
Isikhulumeli senhlanganiso yeZimbabwe Community in South Africa, uMnu. Bongani Mkhwananzi, uthi bemukela ngezandla zombili ukuvulwa kwemingcele lokhu.
“Abantu njengoba behlezi lapha balande imisebenzi kodwa balemideni abayitshiyileyo okwenza ukuthi bayafisa labo ukuhamba besiyabona abathandekayo babo.
Okunye futhi ukuvuleka kwamaborder kwenza ukuthi itrade lokumuva kwamagoods kwenzeke kalula.”
Isikhulumeli senkosi yaKwaMthwakazi uBulelani Lobhengula Khumalo uthi kuzasiza kakhulu ngoba abanengi amaphasipoti asephelelwe yisikhathi abasakwazi ukuthi benzene.
Ufuna njalo uhulumende weZimbabwe lowe South Africa bengalokothi ukwekela kusenzakala ingxabangxoza yesiminyeminye ebonakele nyakenye lekuqaleni komnyaka.
“Ungeke uthi uvule iborder uhlangothi olulodwa ngale kungavulwanga. Kufanele loba kanjani bakhulumisane ukuthi kwenziwa njani.Isiminyeminye lesiyana esikaDecember akufanelanga kwenzeke lokhuyana. Ma kungenzeka ohulumende bobabili sizobafaka icala lokuthi abanaki impilo zabantu ngoba kufe abantu ba expoza abantu kucorona okungalunganga.”
Ukuvalwa kwemingcele lokhu bekuthinta kuphela abantukazana labaphila ngokuthenga impahla kwele South Africa besiyathengisa eZimbabwe.
Abathwala impahla eziqakathekileyo kugoqela labomalayitsha abasebenzisa amaroli amakhulu ndawonye labeZimbabwe abafuna ukuzibuyelela ekhaya bebelokhu bevunyelwa ukuphuma elizweni.
Abahamba ngendizamtshina labo bebelokhu bevunyelwa ukuphuma bengena kwele South Africa.