Ugatsha lwezempilakahle lumanyene lezinye inhlanganiso ezigoqela iUNICEF, World Health Organisation,lezinye lubika ukuthi abantu abanengi elizweni jikelele benelisile ukuyahlabisa abantwababo amajekiseni okuvikela imikhuhlane evame ukuhlasela abantwana.
Umphathintambo wezempilakahle uMnumzana Henry Madzorera uthi ugatsha lwakhe luyasuthiseka ngomkhankaso wokuhlabisa abantwana amajekiseni okuvikela imikhuhlane egoqela indingindi, i Tb, i polio leminye, oqalise ngoMvulo ngeviki edluleyo.Uhlelo lokuhlabisa abantwana amajekiseni luphela ngolweSithathu.
Ugatsha lwezempilakahle lukhangelele ukuhlaba abantwana abayizigidi ezinhlanu kusiyaphela lumkhankaso. NgolweSihlanu kubikwa besekuhlatshwe abantwana phose izigidi ezintathu.Abangaba phose isigidi esisodwa babikwa bethontiselwe umuthi we Vitamin A ovikela indingindi.
Sikhulume lesiphathamandla senhlanganiso ye UNICEF uMnumzana Nicholas Moyo othi okwakhathesi abakatholi imibiko yokuthi kukhona okuphambanisekileyo kulo umkhankaso.
Kulemibiko ephume ngoMvulo ebisithi kwezinye izigaba zeTsholotsho abazali abanengi abayanga hlabisa abantwababo amajekiseni. UBrenda Moyo weStudio 7 uxhume umeli weTsholotsho South ephalamende uMnumzana Maxwell Dube, olilunga njalo lekhomidi ebona ngezempilakahle othi kusiyafika ulweSihlanu lweviki edluleyo abantwana abanengi besebehlatshiwe amajekiseni esigabeni sakhe.
