Sokwenele iminyaka emibili inkokheli yamabandla eZANU PF lamacele omabili eMDC elobelane phansi isivumelwano seGlobal Political Agreement esaletha uhulumende womanyano, kodwa kusesekunengi okulokhe kungahambi kuhle kuhulumende lo.
Okunye okuhluphayo ludaba lokufungiswa kwabosibalukhulu bezabelo, ukufungiswa kukamnu Roy Bennet ukuthatha isikhundla sokuba ngumsekeli womphathintambo wezokulima, lodaba lukasibalukhulu webhanga elikhulu lelizwe uMnumzana Gideon Gono, kanye lodaba lwegqwetha elikhulu likahulumende uMnumzana Johannes Tomana. Umongameli weSouth Africa uMnumzana Jacob Zuma ubephe inkokheli yamabadla akuhulumende womanyano inyanga yokuthi abe eselungisise konke okusele kulenga, kodwa inyanga isize yedlula kungela okwenzakeleyo.
AbeMDC ekhokhelwa nguMnumzana Morgan Tsvangirai bathi sebebuyela kuZuma ukuthi axazulule okuhluphayo kuhulumende lo.
Kodwa abeZANU PF bathi udaba lweZimbabwe kumele luxazululwe ngabantu beZimbabwe. Icele le MDC elikhokhelwa nguMnumzana Arthur Mutambara lithi lizaqhubeka lifuqa ukuthi okuhluphayo kuhulumende lo kulungisiswe.
Umsekeli wesikhulumeli secele leMDC elikhokhelwa nguTsvangirai, uNkosazana Thabitha Khumalo utshele uBrenda Moyo weStudio 7 ukuthi kukhona lapho uhulumende womanyano aphumelele khona.
UBrenda uphinde wakhuluma lesikhulumeli seMDC ekhokhelwa nguMnumzana Arthur Mutambara, uMnumzana Nhlanhla Dube othi ibandla lakhe lizimisele ukuthi uhulumende womanyano aqhubeke ebusa ngemfanelo, ngendlela ezasuthisa uzulu jikelele weZimbabwe.
Ingcwethi ecubungula ezombusazwe uMnumzana Rejoice Ngwenya uthi okuqakathekileyo elizweni yikuthi kulungisiswe indlela ezaphendla ukhetho olukhululekileyo.
